नेपालभाषाया संचार ख्यलय् न्हूगु टेलिभिजन च्यानल ‘नेपाः टि.भी.’ औपचारिक प्रशारण शुरु जूगु दु ।

वंगु मंगलवाः सानेपाय् च्वंगु हेरिटेज गार्डेनय् छगू जूगु विशेष ज्याझ्वःया दथुइ टेलिभिजनया औपचारिक उलेज्या याःगु खः । टेलिभिजन संचालक समितिया नायः दिजेन्द्र शाक्य (राजेन्द्र)या सभापतित्वय् जूगु ज्याझ्वलय् मूपाहां यल महानगरपालिकाया प्रमुख चिरिबाबु महर्जनं टेलिभिजनया औपचारिक प्रशारणया शुभारम्भ यानादीगु खः ।

टेलिभिजनया संचालक समितिया दिप्रिना शाक्यं लसकुस यानादीगु ज्याझ्वलय् कार्यकारी निर्देशक रामकृष्ण खड्गीं टेलिभिजनया बारे जानकारी बियादीगु खः ।

उगु ज्याझ्वलय् बागमति प्रदेश सांसद हरिप्रभा खड्गी श्रेष्ठ, गोदावरी नगरपालिकाया प्रमुख गजेन्द्र महर्जन, किपू नगरपालिकाया उपप्रमुख शुभलक्ष्मी शाक्य, नेपालभाषा मंकाः खलः येँया नायः जनकवि दुर्गालाल श्रेष्ठ, नेपालभाषा एकेदमिया चान्सलरलिसें नेवाः न्ह्यलुवा मल्ल के. सुन्दर, ख्यालिजुजु मदनकृष्ण श्रेष्ठ, बौद्ध विद्वान प्रा. डा. नरेशमान वज्राचार्य, अन्नपूर्ण मिडियाया प्रमुख रामेश्वर थापा, ज्यापु समाज यलया नायः तीर्थलाल महर्जन, बौद्ध विहार संघ यलया नायः नानीकाजी शाक्य, संचारकःमि टिकाराम यात्री लगायतं भिंतुना न्वचुलिसें थःथःगु नुगःखँ तयादीगु खः ।

गुण समूहया न्ह्यब्वयाया रुपय् दुगु टेलिभिजनया औपचारिक प्रशारण ज्याझ्वलय् गुण फिल्म्सपाखें निर्माण जूगु बौद्धकालीन ऐतिहासिक संकिपा ‘पटाचारा’, ‘कृषा गौतमी’ व ‘कर्म’ संकिपाय् मुख्य नायकया भूमिकाय् अभिनय यानादीम्ह नायक कर्म शाक्य (महेश)यात विशेष हनेज्या याःगु ज्याझ्वलय् टेलिभिजनया परीक्षण प्रशारण शुरु याःगु इलय् दकलय् न्हापां प्रशारण जूगु म्युजिक भिडियोया म्येँ हालामि मिना महर्जनयात नं हनेज्या याःगु खः ।

उगु हे ज्याझ्वलय् गुण सिनेमापाखें निर्माण जूगु बौद्धकालीन संकिपा ‘कर्म’या कलाकार, प्राविधिक व ग्वाहालिमिपिं नं मतिनाया चिं लःल्हाःगु खः ।

Categorized in राष्ट्रिय