मल्ल के. सुन्दरयात ‘विराट पूर्ण वैद्य लुमंति सिरपाः’
लहनान्युज | यंलागा चतुर्दशी ११४३, असोज २६ शुक्रवाः
![](https://www.lahananews.com/sites/default/files/mall_1.jpg)
मदुम्ह आधुनिक कवि पूर्ण वैद्यया नामं नीस्वंगु ‘विराट पूर्ण वैद्य लुमंति सिरपाः’ थुगु दँय् नेवाः न्ह्यलुवा लिसें साहित्यकार मल्ल के. सुन्दरयात लःल्हाइगु जूगु दु ।
विराट नेपालभाषा साहित्य सम्मेलन गुथिपाखें थुगु सिरपाः बिइत्यःगु खः । थुगु न्हापांगु सिरपाः मल्ल के. सुन्दरयात बिइगु निर्णय जुइ धुकुगु दु । थुगु सिरपाः १ लाख तका दां व हनापौ न लःल्हाइगु जुगु दु।
थुगुसी मोहनिबलय् कौलाथ्व द्वादशी (कार्तिक ९ गते) कुन्हु जुइगु विराटया ख्वीनिक्वःगु साहित्य सम्मेलनय् थुगु सिरपाः लःल्हाइगु ग्वसाः दु । थुगुसी विराटया साहित्य सम्मेलन ख्वपया बिकुमःछेँय् जुइत्यःगु खः।
विराटया उगु हे साहित्य सम्मेलनय् नेपालभाषा स्नातकोत्तर तगिमय् दकलय् अप्वः ल्याः हयाः पास जूपिं नेपालभाषा केन्द्रीय विभागया राकेशमान मास्के (२०७८) व अनिल स्थापित (२०७९) यात ‘विराट सुरत्न सिरपाः’ नं लःल्हाइ ।
एसईई तगिमय् नेपालभाषा विषयय् दकलय् अप्वः ल्याः हयाः उत्तिर्ण जूम्ह आदर्श मा.वि. लाय्कू थिमिया विद्यार्थी निकेश बसी श्रेष्ठयात ‘नेपालभाषा पदक’ नं लःल्हाइगु ग्वसाः दु।
Categorized in राष्ट्रिय