कप्तान रोहित शर्मां विश्व कीर्तिमानी शतक
क्षितिज श्रेष्ठ | यंलागा त्रयोदशी ११४३, असोज २५ बिहीवाः
![](https://www.lahananews.com/sites/default/files/rohit_1.jpg)
आईसीसी एकदिवसीय विश्वकप क्रिकेटय् भारतं अफगानिस्तानयात ८ विकेटं बूकुगु दु। दिल्लीइ जूगु कासाय् २ सय ७३ रनया लक्ष्य ज्वना वंगु भारतं ३५ ओभरय् २ विकेटया क्षतिइ उगु लक्ष्य पूरा याःगु खः।
भारतया कप्तान रोहित शर्मां विश्व कीर्तिमानी शतक दयकूगु उगु कासाय् अफगानिस्तानयात याउक पराजित याःगु खः। शर्मां दकलय् अप्पो १ सय ३१ रन दयकूगु खः। थुगु विश्वकपय् न्ह्यगूगु शतक खः ।
थ्व नापं शर्मां विश्वकपय् दकलय् अप्पो शतक दयकूम्ह कासामि न जूगु दु। विराट कोहली ५५ रन व श्रेयस ऐरं २५ रनया अविजित म्हितूगु खः । इशान किशन ४७ रनय् आउट जूगु खः। अफगानिस्तानया राशिद खानं निगु विकेट काःगु खः।
टस त्याका न्हापां ब्याटिङ याःगु अफगानिस्तानं निर्धारित ५० ओभरय् ८ विकेटय् २ सय ७२ रन दयकूगु खः। अफगानिस्तानया कप्तान हश्मातुल्लाह शाहिदीं दकलय् अप्पो ८० रन दयकूगु खः। अथेहे, आजमतुल्लाह ओमरजाई न ६२ रन दयकूगु खः। भारतया जस्प्रित बुमराहं प्यंगु ४ विकेट काःगु खः।
हार्दिक पान्ड्यां निगु विकेट काःगु खः। शार्दुल ठाकुर व कुलदीप यादवं छगू छगू विकेट काःगु खः। भारतं थ्व नापं निक्वः तक लगातार त्याकूगु दु।
Categorized in कासा