समितिं काष्ठमण्डप पुननिर्माण क्वचाःगु प्रतिवेदन महानगरपालिकायात लःल्हात
लहनान्युज | यंलागा तृतीया ११४३, असोज १५ सोमवाः
काष्ठमण्डप पुननिर्माण समितिं येँ महानगरपालिकायात ज्या क्वचाःगु प्रतिवेदन लःल्हागु दु। समितिया अध्यक्ष राजेश शाक्य नापं पदाधिकारीपिन्स म्हिगः येँ महानगरपालिकाया प्रमुख प्रशासकीय अधिकृत बसन्त अधिकारीयात प्रतिवेदन लःल्हागु दु ।
पुननिर्माणनाप सम्बन्धित सहमति, नक्सा, प्राविधिक मूल्याङ्कन, आर्थिक विवरण प्रतिवेदन दुथ्याका तःगु दु। २ खण्ड (‘क’ व ‘ख’) या अनुसूचीमध्ये ‘क’ खण्डय् समिति गठन सम्बन्धी पृष्ठभूमि, अवधारणा, पुननिर्माण सम्बन्धी सांगठनिक संरचना व कार्य सञ्चालन विधि, संक्षिप्त कार्य विवरण तयातःगु दु। अथेहे खण्ड ‘ख’ य् आर्थिक बर्ष २०७४÷०७५ निसे आ. व. २०७९÷०८० तक लेखा परीक्षण प्रतिवेदन, स्ट्रक्चर एनालाइसिस प्रतिवेदन, पुरातत्व विभागपाखे स्वीकृत नक्सा, निर्माणया झ्वलय् तयार यानातःगु नक्सालगायत
भ्वँ दुथ्याका तःगु दु। अथेहे मू थां दयकेगु, झिँगटी दयकेगु, मुख्य सामग्री विवरण, पूजा ज्याझ्वः व अनुष्ठानया सूची, वाह्य व थीथी थासय् यानागु अवलोकन भ्रमण, प्राविधिक प्रतिवेदन समावेश याना तःगु दु।
लःल्हागु प्रतिवेदन अध्ययनया लागि सम्पदा लिसे पर्यटन विभागया प्रमुख अर्चना श्रेष्ठ शाक्ययात लःल्हासे प्रमुख प्रशासकीय अधिकृत अधिकारीं, विभागपाखे प्रतिवेदन अध्ययन याये धुका सहलहया लागि सम्पदा पर्यटन समितिइ यकिइगु धका धयादीगु खः । वया लिपा प्रमुख, उपप्रमुखपि नाप सहलहया लागि प्रतिवेदन यकिइगु धका धाःगु दु। वया लिपा काष्ठमण्डप चाय्केगु विषय सहलह यायेगु धका धाःगु दु। समितिं लःल्हागु प्रतिवेदनमा स्पष्ट मजुसा भ्वँ हाकन फ्वनेगु जुइ धका धाःगु दु।
प्रतिवेदन लःल्हानादीसे समितिया अध्यक्ष शाक्यं, महालेखा परीक्षकं धयातःगु विषययात ध्यानय् तया आर्थिक विवरण पेश यानागु दु धका जानकारी बियादीगु खः। शाक्यया कथं महानगरपालिकापाखे उपलब्ध याःगु ११ करोड ५० लाख रुपैयाँ खर्च जुइ धुकुगु दु। ज्या जुइ धुकुगु भुक्तानी यायेत आः ३५ लाख ८६ लाख रुपैयाँ ल्यः दनिइ। महानगरपालिकां काष्ठमण्डपया ताचा लःल्हाये धुका ल्यः दनिइगु ध्यवा बिइत प्रक्रिया न्ह्याकां बिइमाः। वयकलं काष्ठमण्डपयात नियमित सञ्चालन व संरक्षण यायेत, चाय्केगु लागि काष्ठमण्डपयात भौतिक रुपं जिम्मेवारी स्वीकार यायेत इनाप यानादीगु खः।
शाक्यया उगु प्रस्ताव लिपा प्रमुख प्रशासकीय अधिकृत अधिकारीं, भ्वँ स्वये धुका व अध्ययन याये धुका जक ताःचा लःल्हाना कायेगु ज्या न्ह्याइ धका धयादीगु खः। २०७२ सालया तः भुखाचं काष्ठमण्डप पूर्ण क्षति जूगु खः। थुकिया पुननिर्माणया लागि २०७५ साल वैशाख १८ गते जनप्रतिनिधि व स्थानीयपिनिगु मुँज्या याना निर्णयपाखे तत्कालीन प्रदेश सभा सदस्य राजेश शाक्यया अध्यक्षताय् काष्ठमण्डप पुनर्निर्माण समिति गठन याःगु दु। २०७५ ज्येष्ठ २४ गते च्वंगु कार्यपालिका बैठकं उपभोक्ता समितिपाखे पुननिर्माणया ज्या यायेगु व खर्च येँ महानगरपालिकां व्यहारय् निर्णय याःगु खः। वया प्यन्हु लिपा ज्येष्ठ २९ गते महानगरपालिका व समिति दथुइ पुननिर्माणया लागि सम्झौता याःगु खः।
सम्झौता जूगु दिं ज्या न्ह्याकेत समितियात ५० लाख रुपैयाँ लःल्हागु खः। वया लिपा महानगरपालिकां समितियात ०७५ असोज २७ गते ५ करोड रुपैयाँ, ०७६ माघ ९ गते ५ करोड रुपैयाँ व ०७८ असार १६ गते १ करोड रुपैयाँ उपलब्ध याःगु खः।
स्थानीय सहभागिताय् निर्माण जूगु काष्ठमण्डप दूगु स्वया न्ह्यः पुलागु शैली व स्वरुपं निर्माण याना २०७८ चैत २१ गते तत्कालीन राष्ट्रपति विद्यादेवी भण्डारीं लोकार्पण यानादीगु खः । पुननिर्माण समितिया संयोजक शाक्यं, महानगरपालिकाका तत्कालीन प्रमुख विद्यासुन्दर शाक्ययात व प्रमुख शाक्यं तत्कालीन राष्ट्रपति भण्डारीयात ताःचा लःल्हाना लोकार्पण शिलापत्र अनावरण यानादीगु खः ।
वयालिपा मूर्ति स्थापना व प्राविधिक अवस्थाया विषय खँ वयेवं काष्ठमण्डप समितिया हे जिम्मेवारीइ वःगु खः। काष्ठमण्डप पुननिर्माण क्वचायेवं आः करिब ६७ लाख रुपैयाँ बराबरया सिँ लगायत सामग्री ल्यः दुगु समितिं जानकारी बिःगु खः।
Categorized in राष्ट्रिय
