‘महाकवि सिद्धिदास सिरपाः’ नेपालभाषाया वरिष्ठ साहित्यकार फणीन्द्ररत्न वज्राचार्ययात बीगु जूगु दु ।

महाकवि सिद्धिदास महाजुया नामं थुगु दँय् तिनि थुगु सिरपाः नीस्वंगु खः । सिरपाःया लागिं नांजाःम्ह समाजसेवी लिसें लोकंह्वाःम्ह गायक योगेश्वर अमात्यं आर्थिक ग्वाहालि यानादीगु खः ।

जिवंकाछि नेपालभाषा साहित्यया सेवा यानादीपिं साहित्य व भाषासेवी व्यक्ति वा संस्थायात बीगु कथं थ्व सिरपाः नीस्वंगु खः । थ्व सिरपाः न्यय्द्वः (रु. ५०,०००) तका दांया खः ।

वज्राचार्यं वंगु न्हय्गू दशक न्ह्यवंनिसें थौं तक नं निरन्तर च्वयाः नेपालभाषा वाङ्मयया भण्डार च्वजायेकेत योगदान याना वया च्वनादीगु दु । वय्कःया कविता, निबन्ध, बाखं आदि विधाया निगू दर्जन स्वयां अप्वः सफू पिदनेधुंकूगु दु ।

थ्वहे वइगु यंलागा दुतिया सिद्धिदास महाजुया १५६ दँ बुन्हि कुन्हु येँया जनबहालय् जुइगु ज्याझ्वलय् थ्व सिरपाः लःल्हाइगु ग्वसाः दु ।

Categorized in राष्ट्रिय