सुवास नेम्वाङयात राजकीय सम्मान बिइगु सरकारया निर्णय
लहनान्युज | गुंलागा त्रयोदशी ११४३, भाद्र २६ मंगलवाः
![](https://www.lahananews.com/sites/default/files/asas_1.jpg)
संविधानसभा अध्यक्ष सुवास नेम्वाङयात सरकार राजकीय सम्मान बिइगु निर्णय याःगु दु । वयकःयात अन्त्येष्टि यायेगु दिं कुन्हु सार्वजनिक बिदा बिइगु निर्णय बिइगु सरकारं याःगु दु।
नेकपा एमालेया उपाध्यक्ष तक जुयादीम्ह नेम्वाङ थौं सुथय् मदुगु खः। थौं सुथय् प्रधानमन्त्री नाप मन्त्रिरिषदया कार्यालय सिंहदरबारय् मन्त्रिरिषदया आकस्मिक बैठक च्वंगु खः।
उगु बैठकय्, नेम्वाङं संविधान निर्माणया झ्वलय् याःगु योगदानया तधःगु मूल्यांकन यासे राजकीय सम्मान बिया अन्त्येष्टि यायेगु व अन्त्येष्टिया दिं देयन्यक सार्वजनिक बिदा बिइगु निर्णय यायेगु धका सरकारया प्रवक्ता रेखा शर्मां धाःगु दु। सञ्चार लिसे सूचना प्रविधि मन्त्री शर्माया कथं अन्त्येष्टि यायेगु दिं देयन्यकं सरकारी कार्यालय, विदेशस्थित नेपाली दूतावास व नियोगय् राष्ट्रिय ध्वाँय् बच्छि क्वछिकेगु यायेगु निर्णय न सरकारं याःगु दु।
नेम्वाङया काय् विदेशय् जूगुलि लिहा वये धुकां जक अन्त्येष्टि याइगु जुगु दु । वयकःयात अन्त्येष्टि थ्व हे भदौ २८ गते यायेगु तयारी दु । अन्त्येष्टिया दिं सार्वजनिक बिदा जुइ।
Categorized in राष्ट्रिय