सर्वोच्च अदालतं प्रदेश सभाय् सभामुख व उपसभामुखया अनुपस्थितिइ बैठकया अध्यक्षता यानाच्वम्ह सांसदं दायित्व व कर्तव्य सभामुख व उसभामुख सरह जुइ धका उल्लेख यासे विश्वासया मत बिइ मिले मजू धका व्याख्या याःगु दु।

कोशीया मुख्यमन्त्री उद्धव थापां वंगु भदौ ४ गते विश्वासया मत कायेगु झ्वलय् बैठकया अध्यक्षता याना च्वम्ह इस्राइल मन्सुरीं मत बिःगु खः। वयकल उपसभामुखया अनुपस्थितिइ बैठक सञ्चालन यानागु तर थःम्हेसिया कांग्रेस संसदीय दलया सदस्य जूगुलि उगु भूमिका कथं मत बियागु खः धका दाबी यानादीगु खः।

वहे कारण विश्वासया मत हे असंवैधानिक जूगु सर्वोच्च अदालतं थौं बिहीवाः फेसला याःगु खः। न्यायाधीशपि सपना प्रधान मल्ल, कुमार चुडाल व नहकुल सुवेदीया पूर्ण इजलासं फैसलाय् धयातःगु दु‚ ’सभामुखया पद थःहे अध्यक्षता याइगु पद खः । सभामुखया मुख्य जिम्मा हे बैठकया अध्यक्षता यायेगु खः नापं बैठकया अध्यक्षता ग्रहण यानाच्वंगु इलय् सभामुखया अधिकारनापं कर्तव्य न अध्यक्षता याम्ह मनूयाके खनेदु। उगु दायित्व अन्तर्गत प्रदेश सभाय् बैठकया ज्या यायेत तटस्थता व निष्पक्षता कायम यायेगु दायित्व तक समाहित दुगु माने याये माःगु खनेदु।’

नेपाःया संविधान याःगु धारा १८६ नं अध्यक्षता याइम्ह मनूखं मतदानया अधिकार याये दइमखु धइगु व्यवस्था याना तःगुलि उगु धारां केवल सभामुख वा उपसभामुखं जक मतदान याये मदइगु मखुसे अध्यक्षता यानाच्वम्ह मनूखं तक अज्यागु अधिकार दइ मखु धका स्पष्ट व्यवस्था याना तःगु खनेदु धका सर्वोच्चं उल्लेख याःगु दु।

’सू नं दुजः नं संघीय संसदया छु न सदन वा प्रदेश सभाया अध्यक्षता यात धाःसा अज्याम्ह सदस्यं अध्यक्षता यायेगु इलय् सचेतकं बिःगु निर्देशन अःखः मतदान यात धाःसा वा तटस्थ जुल धाःसा दल त्याग यागु माने याइमखु धइगु व्यवस्था याना तःगुलि सभाय् अध्यक्षता यायेगु इलय् तटस्थ जुइमाःगु व पार्टी व्हीप माने याये म्वाःगु अवधारणायार्त मान्यता बिःगु खने दु ‚’ सर्वोच्चया फैसलाय् दु।

अध्यक्ष मण्डलय् मनोनीत सदस्यं अध्यक्षता याना च्वंगु इलय् बैठकय् वयाके मतदान यायेगु अधिकार संविधानतः मदइगुलि बैठकया अध्यक्षता यानाच्वम्ह माननीय सदस्य इस्राइल मन्सुरीयात मत बिइगु अधिकार दुगु माने पाय्छि मजु फैसलाय् धाःगु दु।

’नेपाःया संविधान याःगु धारा १८६ य् प्रतिबन्धात्मक वाक्यांशं मत बराबर जुल धाःसा जक अध्यक्षता याना च्वम्ह मनूखं निर्णायक मत बिइ दइगु व्यवस्थाय् खने दु‚’ फैसलाय् धाःगु दु, ’गन तक धारा १८६ या व्यवस्था सभाय् उपस्थित जुया मतदान याइम्ह सदस्यपिनिगु बहुमतपाखे निर्णय जुइगु प्रस्तावया हकय् जक दुगु व  धारा १६८ य् प्रदेश सभाय् तत्काल कायम दुगु दक्को सदस्यपिनिगु ल्याः याःगु बहुमतपाखे निर्णय जुइमाःगु प्रावधान खने दुगुलि धारा १८६ या प्रतिबन्धात्मक वाक्यांशय् दुगु अध्यक्षता याइम्ह मनूयात मत बिइगु अधिकार दइ मखु धइगु व्यवस्था धारा १८८ या हकय् लागू दइ मदइगु धइगु न्ह्यसः दु।’

Categorized in राष्ट्रिय