नेवाः पत्रकार राष्ट्रिय दबू न वरिष्ठ पत्रकार उजिर मगरयात बुखँ च्वंगु आधारय् स्यायेगु ख्याच्वः बिइगुलि गम्भीर ध्यानाकर्षण याःगु दु।

दबूया महासचिव केके मानन्धरं म्हिगः छगु बिज्ञप्ती जारीयासे लोकान्तर डट कम न्यूज पोर्टलय् मगरं बाइलाइन वंगु साउन १६ गते मंगलबाः ‘लुँ काण्डय् माओवादीया रोल्पाया नेतायात छ्यं स्यागु जुगु दु थबाङया अमला’ शिर्षकय् बुखँ सम्प्रेशन याःगु खः। अमला रोक्का लुँ तस्करी द्धपनय् ज्वना तःम्ह तिब्बली मूलया बेल्जियम नागरिक दावा छिरिङया जहान खः।

मगरं बुखँ अमलाया नां उल्लेख जुगुलि आरोपित पक्षं प्रेस व अभिव्यक्ति स्वतन्त्रताय् गम्भीर उल्लंघन जुइगु कथं धम्की बिइगु कदापि जायज मखु ।

बुखँ प्रति विमती जुगु अवस्थाय् कानुनी लँ मालेगु विकल्प दुगु अवस्थाय् वरिष्ठ पत्रकार मगरयात भौतिक आक्रमण यायेगु व मनू हे स्यायेगु तक धम्की बिइगु नेपाली प्रेस व पत्रकारया सुरक्षाय् न्ह्यसः वःगु दु, सुरक्षा चुनौती जूगु दु।

अथेहे वरिष्ठ पत्रकार उजिर मगरयात धम्की बिइगु थे जाःगु अराजक गतिविधि याःपिन्त कारबाहीया लागि पत्रकार दबू जोडदार माग याःगु दु धका दबूया महासचिव मानन्धर पिथःगु बिज्ञीती च्वयातःगु दु।

Categorized in राष्ट्रिय