प्रज्ञा भवनय् म्हिगः निसे नेकपा (माओवादी केन्द्र) या केन्द्रीय समिति याःगु प्यक्वःगु पूर्ण बैठकय् पार्टी अध्यक्ष पुष्पकमल दाहाल ‘प्रचण्ड’ न राजनीतिक प्रतिवेदन न्ह्यब्बःगु खः।उगु बैठकय् १८ म्ह केन्द्रीय सदस्यपिन्स थःपिनिगु बिचः तये धुकुगु दु।

प्रत्येक सदस्यपिन्त ५ मिनेट थःगु नुँगः खँ तयेगु ई बिःगु खः। उगु बैठकय् प्रचण्डया राजनीतिक प्रतिवेदनय् सदस्यपिन्स तसकं आलोचना याःगु दु। केन्द्रीय सदस्य ओम शर्मां पार्टी स्यगूया मू दोषी पार्टी अध्यक्ष प्रचण्ड हे खः धका द्धपः बिःगु खः।

वयकलं धयादीगु दु, ‘माओवादी पार्टी स्यंगू हे अध्यक्ष कमरेड प्रचण्डं याना खः।’ मेम्ह केन्द्रीय सदस्य हिमाल शर्मां न पार्टी स्यंगू धयागु हे मू दोषी अध्यक्ष प्रचण्ड खः धका द्धपः बिःगु खः। केन्द्रीय सदस्य लक्ष्मण पन्तं धाःसा सरकारय् वना नेतृत्वं अनैतिक गैरकानूनी ज्या याःगु व ज्या यायेत थःथितिपिन्त जक सचिवालयय् नियुक्त याःगु द्धपः बिःगु खः।

नेता पन्तं प्रधानमन्त्री लिसे माओवादी केन्द्रया अध्यक्ष पुष्पकमल दाहाल प्रचण्डया निजी सचिवय् थःम्ह्याय् गंगा दाहाल उपप्रधान नाप गृहमन्त्री नारायणकाजी श्रेष्ठं निजी सचिवय् सुरेशकाजी श्रेष्ठयात केन्द्रीत यासे धाःगु दु, ‘दाहालं निजी सचिव दाहाल दयकेगु व श्रेष्ठया निजी सचिवय् श्रेष्ठ जुगु संयोग जक मखु। अनैतिक व गैरकानूनी ज्या यायेगु लागि परिवारया हे सदस्य सचिवालयय् नियुक्त याःगु खः।’ पन्तं नेताया पारिवारिक सदस्यपिन्त निजी व स्वकीय सचिवं चिइकेत केन्द्रीय समिति बैठकं निर्णय यायेगु माग तक यानादीगु खः। वयकलं झीदँया जनयुद्धय् छाय् थःपिनिगु थःथितिपि सचिवालय मतःगु धका न्ह्यसः तयादीगु खः।

अथेहे मेम्ह केन्द्रीय सदस्य रबिन्द्र श्रेष्ठं माओवादी नेतृत्वं स्वनिगलय् प्राथमिकता मबिउगु कारण संगठन विस्तार जुइमफुगु व कमजोर जुयावःगु धका धयादीगु खः। वयकल धयादीगु दु, ‘जनयुद्धय् नेवा राज्ययात प्राथमिकता यक्को बिःगु खः। तर, जब पार्टी सरकारय् वन व नेतृत्वय् थ्यन स्वनिगःयात प्राथमिकता बिइगु त्वतल।’ वयकलं धयादीगु दु प्रधानमन्त्री प्रचण्डया निजी सचिव रमेश मल्लयात नापलायेगु स्वसः ई मबिइगु व अःखतं हेपे यायेत स्वइ धका धयादीगु खः।

वयकलंं धयादीगु दु, ‘प्रधानमन्त्री नाप पार्टी अध्यक्ष प्रचण्ड कमरेडया निजी सचिवया जिमिसं स्वापू तयेत स्वसा जिमितं अःखतं न्ह्यसः तयेगु याइ। ‘‘छिकपिन्स येँ गुलि सिट व स्थानीय तह गुलि हयाःगु दु?’’ धका जिमित व्याग्यात्मक शैलीं नापलायेत अस्वीकार यानाच्वंगु दु।’ उलि जक मखु पार्टीया बरिष्ठ उपाध्यक्ष नाप उपप्रधान लिसे गृहमन्त्री नारायणकाजी श्रेष्ठयात न नापलायेगु थाकूया च्वंगु दु धका केन्द्रीय सदस्य श्रेष्ठं धाःगु दु।

Categorized in राष्ट्रिय