म्ये हालामि मिनर्वादेवी शाक्य बज्राचार्यं सलय् “जीवन अनमोल खःथ्व जीवन” म्येया म्युजिक भिडियो मंगलवाः छगू ज्याझ्वः दथुइ मूपाहाँ बागमति प्रदेशया सांसद हरिप्रभा खड्गी श्रेष्ठ पितब्वज्या यानादीगु खः।

बुद्ध दर्शन व जीवन दर्शनया लिधंसा कया वरिष्ठ म्ये च्वमि संघरत्न शाक्यया च्वसाय् मिनर्वा सलय् रजय बज्राचार्यं पिथनादीगु खः। रविन्द्रमान शाक्यया सभाध्यक्षताय् जूगु उगु ज्याझ्वलय् जनगायक भृगुराम श्रेष्ठ विशेषपाहां व नेवाः म्ये संकिपा ख्यःया न्हापांम्ह निर्देेशक विजयरत्न असंबरे पाहां कथं झायादीगु खः ।

नरेन्द्रमान शाक्यं लसकुस यानादीगु उगु ज्याझ्वलय् म्ये हालामि मिनर्वा, कलाकार शोभा महर्जन, परिकल्पनाकार व निर्देशक रवि सायमि, म्ये च्वमि शाक्य, पाहाँ विजयरत्न असंबरें थःथःगु नुगः खँ प्वंकादीगु खः ।

थुगु म्येया लय् चिनामि व बाजं ग्वसाः विरेन शाक्य, सिनेग्राफर भवानी शिलाकार निर्देशन व सम्पादन रवि सायमि, समाः रुपा मानन्धरपिन्सं यानादीगु खः ।

संघरत्न शाक्य, सुशिल राजोपाध्याय, आशाकाजी थकुं, सरस्वती मानन्धर, शोभा महर्जन, नेरिसा महर्जन, केशनी शाक्य श्रेष्ठ, लुनिभा मानन्धर, मन्दिरा मानन्धर, रिया महर्जन, रमन महर्जनपिन्सं अभिनय यानादीगु खः ।

Categorized in मनोरन्जन