नेप्से ६३ दशमलव २४ अङ्कं थहावन
लहनान्युज | अनलाथ्व पंचमी ११४३, साउन ७ आईतवाः
![](https://www.lahananews.com/sites/default/files/stock_19.jpg)
चालु आर्थिक वर्ष २०८०/८१ या मौद्रिक नीति सार्वजनिक जुइवं थौं आइतवाः शेयर बजाः तसक थाः वःगु दु। मौद्रिक नीतिं आःया व्यवस्थायात आः थे तु तया शेयर लगानीया बारेय् बिस्क मार्गदर्शन दयकेगु उल्लेख यानातःगु खः।
शेयर बजाः परिसूचक नेप्से थौं ६३ दशमलव २४ अङ्कं थहावना २ हजार २ सय २७ दशमलव १६ विन्दुइ थ्यःगु खः। नेप्से खुला लिपा थ्व हे तसक थहावःगु खः। थ्व स्वया न्ह्यः वंगु पुस २८ गते नेप्से २२ सय ३७ विन्दुइ थ्यःगु खः।
वया लिपा २२ सय २२ विन्दु स्वया अप्पो नेप्से बजाः थ्यःगु मदु। थौं दक्को समूहया शेयर थहावःगु दु सा बैंकिङ, बीमा, व्यापार व विकास बैंक समूहया शेयर तसकं थहावःगु दु। बजाः नाप कारोबार रकम न यक्को सुधार जूगु दु।
थौं १ करोड २० लाख २ हजार कित्ता शेयर ४ अर्ब ३७ करोड ५१ लाख रुपैयाँया कारोबार जूगु दु। दकलय् अप्पो शिवम् सिमेन्टया १४ करोड ८१ लाख रुपैयाँया शेयर कारोवार जूगु दु। किसान लघुवित्त, चन्द्रागिरि हिल्स व लिबर्टी इनर्जी कम्पनीया शेयर १० प्रतिशतं थहावःगु दु।
अथेहे स्वरोजगार लघुवित्त, ग्लोबल आईएमई बैंक व कालिञ्चोक दर्शन प्रालीया शेयर ९ प्रतिशत स्वया अप्पो थहावःगु दु।
Categorized in राष्ट्रिय