कम्बोडिया सरकारया ब्बनाय् निर्वाचन पर्यवेक्षणया लागि औपचारिक भ्रमण वना च्वम्ह नेकपा एमालेया अध्यक्ष लिसे पूर्व प्रधानमन्त्री केपी शर्मा ओलीं कम्बोडियाया प्रधानमन्त्रीयाना नापलागु दु।

राजधानी नोम्पेनय् थौं सुथय् प्रधानमन्त्री हुन सेनयाना नापलागु दु धका ओलीया निजी सचिवालयं धाःगु दु। ओलीनाप थीथी देय् या २२ म्ह वरिष्ठ राजनीतिज्ञपि निर्वाचन पर्यवेक्षणया लागि कम्बोडियाय् वःगु खः।

ओलीयात विमानस्थलय् अनया परराष्ट्र मन्त्रालयया उच्च अधिकारीपिन्स लसकुस याःगु खः। विमानस्थलय् ओलीनाप पाकिस्तानया पूर्व प्रधानमन्त्री युसुफ राजा गिलानी, नाइजेरियाया पूर्व राष्ट्रपति जोनाथन गुडलकपिन्स न नापलागु दु धका सचिवालयं धाःगु दु।

कम्बोडियाय् जुयाच्वंगु निर्वाचनय् १८ गु दलं ब्बति काःगु दु। थीथी ६५ देशया ३३५ म्ह पर्यवेक्षकपिन्स ब्बति काःगु दु।

Categorized in राष्ट्रिय