गणेश साय्मि । बैंशं बुरा खनेदय्धुंकूम्ह व्यक्ति जूसां जोश, जाँगर व उमंगया गुण धाःसा जिउँका तिउँ ल्याय्म्ह तिनि । अल्सि, उसि धाइगु खनेमदु । न्ह्याबलें लय्ताः ख्वाः वः, न्हिलां जाः । न्ह्यागु ज्या नं, खँ नं छर्लङ्ग, लःसा लः, दुरु सा दुरुया रुपं जुइमाः धाइम्ह । थ्व हे वय्कःया विशेषता खः । थ्व हे विशेषताया हुनिं वय्कः बैंशं बुरा खनेदय्धुंकूसां वय्कःयात थौंकन्हय्या ल्याय्म्ह पुस्तां ध्वय् फइमखुनिगु खनेदु । मनू धइम्ह थथे हे जुइमाः ।