न्हापानिसें आःतकं मात्र असारे विकास
काजीरत्न | दिल्लागा त्रयोदशी ११४३, असार ३० शनिवाः
थाय्थासय् विकास वःगु दु पासापिं, लय्तानादिसँ, उत्सव न्याय्कादिसँ । आः छुं दिनं हे झीगु थाय्बाय्या ख्वाःपाः हे हिलेत्यंगु दु । छुं दिं लिपा हे झीगु देय् सिंगापुर जुइत्यंगु दु । अझ सिंगापुर जुइत्यंगु जक छाय् धाय्, सिंगापुर स्वयां बांलाय्त्यंगु दु। का, छि पत्याः मजूला ? पत्याः मजूसा थःगु छेँय् नं पिने छकः स्वयादिसँ सा, चुक, ननि, बहाः, बही दक्वथासय् ल्वहँतं सीगु, ल्वहँ दुथाय् ल्वहँ लिकानां न्हूगु ब्लक लाय्गु, ब्लक दुथाय् न्हूगु ल्वहँ लाय्गु, धः दय्केगु, लँ पीच याय्गु थुज्वःगु विकासया ज्यात गुगु गतिइ जुयाच्वंगु दु, व गतिं ला कन्हय् हे झीगु थाय्बाय्या ख्वाःपाः हिलीगु पक्का हे जुल नि । मखुला ? आः विकास निर्माणया ज्यां गति काःगु मखुला ले ?
थथे धाधां गुलि लय्तायाच्वनाम्ह का जि । छक्वलं हावा हे फुस्के जुल बाः जिगु ला । छम्ह पासा वयाः जितः ‘इ, विकास जुल का’ धकाः म्वाय् चुइकाबिल बाः जितः ला । अले उलिमछि ज्या जुयाच्वंगु छं मखंला धकाः जि नं जागय् जुयां ला असार का असार, मेगु छुं नं मखु धाःबलय् जिगु हावा फुस्के मजूला ?
व्यवस्था हिल, नेता हिल, विचारधारा हिल, दक्वफुक्व हिल । तर असारे विकास धाःसा झीथाय् मद्यूगु खनी । असार वल कि बजेट फुकेत वा वय्क सडक पीच याय्गु, छुं हे मजूगु ल्वहँ नं लिकयाः मर्मत याय्गु, ल्वहँ दुथाय् ब्लक लाय्गु, ब्लक दुथाय् ल्वहँ लाय्गु थुज्वःगु ज्या न्हापाया व्यवस्थानिसें आःया व्यवस्था, येँ नगरपालिकानिसें येँ महानगरपालिकाया बालेन साह तकं व हे कथं जुयाच्वन तिनि । थुकी सुनां विरोध याय्गु ला छु, न्ह्यसः छुइगु ज्या तकं मयाःनि।
का, आत्मसमीक्षा छकः याय्, झीसं नेतातय्त ब्वः बिया, मेयरयात ब्वः बिया, वडाध्यक्ष, वडा सदस्यतय्त ब्वः बिया । तर थःगु छेँय् म्वाःमदय्क असारे विकासया ज्या याःबलय् थ्व म्वाःमदुगु ज्या याय्म्वाः धकाः गबलें झीसं पना ला ? पनेगु ला खँ त्वःते, छुं हे मजूथाय् म्वाःसा म्वाःसां छिमिसं छाय् स्यंका धकाः न्ह्यसः तयाला ? दक्वसिनं ला खइमखु, तर अप्वःसिनं मपना, न्ह्यसः मतयाः धइगु लिसः बीगु पक्का खः ।
भ्रष्टाचार पदय् थ्यंपिन्सं याइ । तर उमित भ्रष्टाचारी दय्केगु ज्या, भ्रष्टाचारयात जन्म बीगु ज्या जनतां अथवा धाय्, झीसं हे यानाच्वनागु मदुला ? खँ सुमचुकूसे, आगं उलेगु खःसा लिसः पक्कां हे छगू हे वइ, खः, भ्रष्टाचारयात झीसं हे जन्म बियाच्वना । धेबा नय्गु जक भ्रष्टाचार मखु, नकेगु नं भ्रष्टाचार खः, धेबा नय्त ग्वहालि याय्गु नं भ्रस्टाचार खः । गणतन्त्रया दकले तःधंगु उपलब्धि वाक स्वतन्त्रता खः, सः तय्नु । मेगु मखुसां सामाजिक संजाल दक्वसिगु ल्हातय् दु । सामाजिक संजालमार्फत अनावश्यक असारे विकासयात भण्डाफोर याय्नु ।
