श्री पचलि भैरवया झिंनिदँ जात्रा खड्ग सिद्धि जात्रा (गथु प्याखं) थुगुसि पिकाइगु जूगु दु । थुगु प्याखंया लागिं माःगु जुइधुंकूगु दु धका गुथिया नायः भरत माली लहनान्युजया जानकारी बिःगु दु।

थुगु जात्राया लागि औपचारिक कथं कन्हय् एकादशी कुन्हुंनिसें न्ह्याइगु जूगु दु । कन्ह्यः प्याखं पिकायेगु लागिं कामिका एकादशि कुन्हु हनुमानध्वाखाय् ग्वय्दां तयेगु ज्या जुइ धका नायः माली लहनान्युजयात धाःगु दु ।

ग्वय्दां तयेगु धकाः हनुमानध्वाखाय् वनाः अन तयातःगु खड्गय् पुज्यानाः ग्वय्दां तइगु खः । थुकिया लागिं कन्हय् सुथय् थनया ज्याबहालय् च्वंगु द्यःछेँ (वडा नंं. २१ वडाया ज्याकू दुगु छेँ) य् मुनाः अनंनिसें बाजं थानाः ग्वय्दां तः वनेगु तयारी जुयाच्वंगु दु । ग्वय्दां तयेधुंकल कि प्याखं पिहां वइगु निश्चित जुइ । वयांलि गथांमुगःनिसें पचलीइ हे प्याखं स्यनेगु ज्या जुइ ।

थ्व प्याखनय् मोहनि कुन्हु जुजुलिसे खड्ग हिले माःगु परम्परा दु ।

Categorized in राष्ट्रिय