बांलाःसा जिं यानागु, बांमलाःसा छं यात
काजीरत्न | दिल्लागा नवमी ११४३, असार २६ मंगलवाः
![](https://www.lahananews.com/sites/default/files/default_images/default-image.jpg)
थौंकन्हय् समाजय् छगू प्रवृत्ति तसकं तःधना वयाच्वंगु दु । थौंकन्हय् छु, न्हापांनिसें धाःसां ज्यू । थज्याःगु प्रवृत्तियात ज्याथःजिथिपिन्सं धाय्गु याः, ‘कलियूग वःगु का, कलियूग, धर्म धयागु मन्त मनूतय्के ।’ छु प्रवृत्ति खःले थ्व कलियूग धाइगुपती ? मनूतय्सं ज्या याइ, छुं बांलाःगु जुल कि जिं यानागु, बांमलात वा स्यनकि मेपिन्त दोष बीगु । गुण जुक्व जि, अवगुण जुक्व फल्ना, धिस्का ।
व हे ला, थ्व प्रवृत्ति न्हूगु वा थौंकन्हय् वःगु ला मखु । तर आः थुकिया चर्चा धाःसा यक्व जुयावःगु दु, थज्याःगु प्रवृत्तिया महसूस अप्वयावःगु दु । गन ले ? गन अप्वः खनेदयाच्वन थज्याःगु प्रवृत्ति ? गन धकाः न्यने हे म्वाः, झीगु जःखः न्ह्याथासं दु, झीगु छेँय् हे दु, त्वालय् हे दु, समाजय् दु, झीगु भौगोलिक लागाय् सकभनं दु । थाय्थासय् न्हियान्हिथं, पल पल पतिकं थ्व प्रवृत्ति खनेदयाच्वंगु दु ।
थ्व प्रवृत्ति बांमलाः, मज्यू धकाः झी दक्वसिनं स्यू । थथे याय्मज्यू, पुचलय् ज्या यात, नेतृत्व कयाः ज्या यातकि बांलाःगुया जस दक्वलिसे इनेमाः, ज्या मजुल, स्यनकि उकिया दोष थम्हं काय्माः धकाः दक्वसिनं आदर्शवादी खँ ल्हाय्गु याः । तर व्यवहारय् थज्याःगु स्वार्थी प्रवृत्ति ब्वयाच्वनापिं नं झी हे खः । आः ला जुजुं थुलितक जुइधुंकल कि जस जुक्व थम्हं काय्गु ला मखु, थम्हं समर्थन यानाम्ह नेतायात जस जक बीमाःगु थज्याःगु प्रवृत्ति नं झीसं हे ब्वयाच्वना ।
आः झीगु जःखः स्वयादिसँ ले, न्हापा हे जुइधुंकूगु ज्या नं फल्नां याःगु धकाः थः यःम्ह मनूयात जस बीगु, छुं ज्या नीजि स्तरं जूसां व हे थः यःम्ह मनूया नांलिसे स्वानाबीगु, मूल सडक दय्कल, व मूल सडक थः यःम्ह मनूया क्षेत्राधिकारय् मलाःसां उकिया जस नं व हे मनूयात बीगु, पुलय् गमला छगः तःसा मुक्कं शहर हे वाउँकाब्यूगु थें खँ ल्हाय्गु, व हे पुल क्वय् फोहोर द्वँचिनाच्वन धकाः सुनां धाःसा ‘दक्वं ज्या व हे छम्हेसिनं जक यानाबीमाःगु ला, व फोहोर छाय् मुंकः हुँ धकाः धाय्गु । व हे छम्हेसिनं ज्या याःगु धाय्त नं छु छु ज्या, गुलि यात वा मेपिन्सं याःगु ज्या नं थम्हं यानागु धकाः गुलि हल्ला यात धइगु दुवाले ला बाँकि हे दनि । तर दुवालेगु खँ ला छु, सुनां आलोचना याय्गु ला त्वःता हे छ्वय्, सुझाव जक ब्यूसां व्यक्ति विशेषया समर्थनय् जनता छाय् म्हुतु वाय्त तकं लिफः मस्वयाच्वन ?
आलोचना, सुझाव थज्याःगु ज्यां मनूयात भिंकी, मार्गदर्शन याइ । म्वाःमदुगु समर्थन, बढाईँचढाईँ नं मनू मात्ते जुयावनी । थ्व मानवीय प्रवृत्ति, स्वभाव हे खः । सुं नं मनू थज्याःगु स्वभावं तापाय्गु धइगु तसकं थाकु । अय्जूगुलिं थम्हं समर्थन यानाम्ह धाय्वं तुं वया समर्थनय् थः पासाभाइपिन्त तक नं म्हुतु वाय्त लिफः मस्वय्गु खःकि सहि मार्गदर्शनया लँ लीगु खः ? आः बिचाः याय्मालेधुंकल ।