लोकह्वाम्ह कलाकार गणेश साय्मीयात थःगु छगु ज्याझ्वः दथुइ तजिक हने ज्याझ्वः जूगु दु। गणेश साय्मी २०२२ सालय् रेडियो नेपालं नेपालभाषां समाचार लिकाउगु आन्दोलन निसे थौं तक नेपालभाषा ख्यलय् मदिक्क योगदानया कदरयासे हना ज्याझ्वः याःगु खः।

वयकलं नेपाल संवतया आन्दोलनय् न मदिक्क योगदान यानादीगु दु सा नेपालभाषा मंकाः खलःया संस्थापक दांभरी नाप ख्यालय् बिधाय् न कलाकार व निर्देशक जुया यक्को म्हितादीइ धुकुम्ह खः। थौं नेपालभाषा मंकाः खलःया नायः जनकवि दुर्गालाल श्रेष्ठं दोसल्ला न्यय्का हना पौ लःल्हनादीगु खः।

अथेहे नेवाः न्ह्यलुवाः मल्ल के सुन्दर व कजि राजेन्द्र मान शाक्यं बेताली चिकां हनादीगु खः। पत्रकार सुरेशकिरण मानन्धर, येँ महानगरया १७ वडाध्यक्ष नाप प्रवक्क्ता नबिन मानन्धर, ख्यालि जुजु मदनकृष्ण श्रेष्ठ व नेवाः न्ह्यलुवाः मल्ल के सुन्दरपिन्स गणेश साय्मीं नेपालभाषाय् योगदान यानादीगु बारे थःपिनिगु नुगः खँ तयादीगु खः।कलाकार राजेन्द्रमान शाक्यया अध्यक्षताय् हना ज्याझ्वः जुगु खः। थौं जुगु उगु ज्याझ्वलय् थीथी खलः पुचः न हना पौ लःल्हादीगु खः।

वयकःयात छगु लखं न्ह्य्य न्याद्धः नगद कजि शाक्यं लःल्हानादीगु खः। गणेश साय्मी थःत लःल्हागु ध्यवा मध्ये न्ह्य्य न्याद्धः नेपाल संवत ज्याझ्वःयात लःल्हायेगु व छगु लख थःगु वासः यायेगु निति खर्च यायेगु धका धयादीगु खः।

Categorized in राष्ट्रिय