गोलभेंडा काण्ड
काजीरत्न | दिल्लाथ्व षष्ठी ११४३, असार ९ शनिवाः
![](https://www.lahananews.com/sites/default/files/field/image/gol.jpg)
भातासि, अर्थात गोलभेंडा काण्ड। छुं दिं न्ह्यः भाः मवल धकाः किसानतय्सं येँया कालिमाटीइ गोलभेडा लँय् वछ्वयाः विरोध प्रदर्शन यात। इलय्ब्यलय् दुरुया ज्या याइपिं किसानतय्सं नं थथे हे दुरु लँय् प्वंकाः विरोध प्रदर्शन यात धकाः खबर वयाच्वनी । थथे जूगु न्हापांगु खुसी मखु, इलय्ब्यलय् किसानतय्सं थःगु उत्पादन लँय् ह्वलाः, प्वंकाः विरोध प्रदर्शन याइ । थज्याःगु लू खनीबलय् यक्वसिनं धाय्गु याः, ‘गुलिसिया नय् मखनाः दुःख, गुलिसिया वा.छ्वय्त दु का ।’
खःगु खँ, थन न्हिछिया छछाः म्हुतुइ तय्त थाकुपिं आपालं दु। छछाःया नितिं सिनाः सिनाः ज्या याय्माःपिं यक्व दु। किसानतय्सं थम्हं धयागु धेबा मन्तकि धाःसा तरकारी वा दुरुइ लँय् प्वंकाबी, ह्वलाबी । दुःख किसानतय् नं दइ तर, नसा ज्वलंया थथे नाश यानाः समस्याया समाधान जुइगु खःला
? जुइगु खःसा ला छकः तरकारी लँय् ह्वलेधुंकाः अथवा दुरु छकः लँय् प्वंकेधुंकाः लिपा अज्याःगु अवस्था मदइगु खः।
थथे धाय्बलय् आः किसानतय्सं विरोध तकं याय्मदुला धइगु न्ह्यसः नं वय्फु। पक्का नं दु, थःत ताःगु खँ धाय्गु, मयःगु खँया विरोध याय्गु अधिकार लोकतन्त्रय् सकसितं दु तर, नसा ज्वलंया नाश यानाः हे विरोध याय् माःला ? व तरकारी ह्वलेगु पलेसा छुं वृद्धाश्रमय् वनाः इनाब्यूगु जूसा हाःनाः मदुपिं थें च्वनाच्वंपिं ज्येष्ठ नागरिकपिन्सं गुलि सुवाः बिल खइ। दुरु छुं मचातय्गु अस्पतालय् वनाः बियाब्यूगु जूसा मचातय् म्हुतुइ लात खइ । बरु थज्याःगु ज्यायात छगू विरोधया रुपय् याय्ज्यू।
आः नसा ज्वलं लँय् ह्वलाः सितिं छ्वयाः छु दत? समस्या समाधान जुल ला? पक्कां मजूनि, समस्या ला ज्यों का त्यों हे तिनि। बरु, समस्याया समाधान न्ह्यःने तयाः सम्वन्धित निकाय, अभियानकर्मी, संघसस्ंथातलिसे सम्वाद याःगु जूसा समाधान पिहांवय्फु अथवा समाधानपाखे न्ह्याःवनेफु। सरकारं खँ मन्यंगु खःसा सरकारयात दबाब बीत छगू सांगठनिक शक्तिया निर्माण यानाः न्ह्याःवने जी फु। संचारमाध्यम, सामाजिक संजालमार्फत थःगु सः बुलन्द याःगु जूसा समर्थनया सः अप्वयावनेफु।
लँपु यक्व दु, सम्वाद, धर्ना, सांगठनिक शक्ति प्रदर्शन, संचारमाध्यम, सामाजिक संजाल। थ्व छुं नं माध्यम वा लँपुयात मज्वंसे नसा ज्वलं सितिं छ्वय्गु ज्या जक जुल। खतुं व नसा ज्वलं किसानयागु हे अधिकार खः तर मनूतय्त प्वाः जाय्केत माःगु नसा ज्वलंयात उकथं नाश याय्गु पक्का नं बांलाःगु वा सहि ज्या मखु।
थथे धाय्बलय् किसान जक गलत धाय्त्यनागु पक्कां मखु, मात्र विरोध प्रदर्शनया तरीका गलत जुल धयागु आशय जक खः।