मुदिता सेवा गृहया संस्थापिकायात मातृशोक
लहनान्यूज सम्वाददाता | कौलागा नवमि ११३६ (अक्टोबर २४ २०१६)
![](https://www.lahananews.com/sites/default/files/mudita.jpg)
ज्याथःपिं नागरिक, याकः मिसा अले असहाय, अनाथ मचातयगु सेवाय् समर्पित मुदिता सेवागृहया संस्थापिका नायः अले समाजसेवी राज्यलक्ष्मी बज्राचार्ययात मातृशोकं कःगु दु ।
नायः बज्राचार्यया मां लक्ष्मीदेवी बज्राचार्य ९०दँया वैंशय् आइतबार चान्हय् वासः यायेगु झ्वलय् मदुगु खः । ताः इलंनिसें ओष्टोपोरोसिस ल्वचं कयाच्वंम्ह मदुम्ह बज्राचार्यया थौं शंखमुलस्थित घाटय् दाहसंस्कार याःगु दु ।
मदुम्हेसिया आत्माया चीरशान्तिया कामना यासें सामाजिक, धार्मिक ख्यलय् ज्या यानाच्वंपिं मनूत, उद्यमीलिसें थीथी ख्यःया व्यक्तित्वपिं शंखमुलय् थ्यंकाः मदुम्हेसित लिपांगु श्रद्धाञ्जली प्वंकूगु खः ।
ओष्टोपोरोसिस ल्वचं कयाच्वंम्ह थः मांया सुसाःकुसाःलिसें महत्वबोध यानाः वयकःया हे हःपालं समाजसेवी राज्यलक्ष्मी बज्राचार्यं मेपिं ज्याथःपिं नागरिकतयगु संरक्षणया लागिं मुदिता सेवागृह स्थापना यानाद्यूगु खः ।
थः मांया लागिं जक मखसें थीथी परिवेशय् लाःपिं असहायपिन्त पारिवारीक लकस दयेकेगु आज्जुं याकः मिसा व असहाय, अनाथ मचातयगु कल्याण यायेत बज्राचार्यं थःगु हे नीजि भवनय् संस्थायात थाय् बिया वयाच्वनादीगु खः ।
Categorized in राष्ट्रिय