नेकपा एमालेया अध्यक्ष केपी शर्मा ओलीं पार्टी केन्द्रीय सदस्यपिन्त हिन्दु राज्यया पक्षय् न्वमवायेत निर्देशन बिःगु दु।

थौं शनिवाः क्वचाःगु केन्द्रीय कमिटी बैठकं अध्यक्ष ओलीं नेतापिन्त पार्टीया दर्शन व विचाः लुमकेत इनाप याःगु दु। ‘निम्ह प्यम्हेसिया हिन्दु राज्य धयाच्वंगु दु, उमिगु खँ न्यना वनेगु मखु। पार्टीया दर्शन व सिद्धान्तपाखे ध्यान बिइमाः’, ओलीं बैठकय् धाःगु खः।

बैठकय् सहभागी छम्ह नेताया कथं, अध्यक्ष ओलीं आः देशय् हिन्दु राज्य वइमखु धका प्रष्ट याःगु दु।

ओली धाःगु दु राज्यया छु न धर्म दइमखु व दक्को धर्मावलम्बीपिनिगु देय् जुइ धका धयादीगु खः। ‘देशय् हिन्दु धर्म माने याइपि यक्को दु, थुगु धर्म असहिष्णु मदु, थुकियात माने यायेमाः।

तर आः लिहावने फइमखु’ धका ओलीं धाःगु दु। अध्यक्ष ओलीं भारतया तक उदाहरण न बियादीगु खः। ‘नां हे हिन्दुस्थान जूसा भारत हिन्दु राज्य मखु, धर्मनिरपेक्ष देश खः’, ओलीं धका धाःगु दु।

Categorized in राष्ट्रिय