लोकसाहित्य परिषदं ग्वसालय् वाङ्गमय शताब्दी पुरुष डा. सत्यमोहन जोशीया १०४ क्वःगु बुदिं हनेगु झ्वलय् बुधवाः निगू साहित्य कृति सफू पितब्वज्या जूगु दु ।

शताब्दी पुरुष डा. जोशीं रचना यानादीगु मचा चिनाख सफू “चखुंचां हाःगु म्ये” व साहित्यकार मीना बज्राचार्यं च्वयादीगु मचा बाखं सफू “किसिया नसा क्वःया दसा”या पितब्वज्या जूगु खः ।

परिषदया नायः राजित बहादुर श्रेष्ठया सभाध्यक्षताय् जूगु उगु ज्याझ्वलय् मूपाहाँ नांजाःम्ह साहित्यकार हितकरवीर सिंह कंसाकार, विराट नेपालभाषा साहित्य सम्मेलन गुथिया नायः महेन्द्र गोपाल कर्माचाय, यल महानगरपालि वडा १६ या वडाध्यक्ष निर्मलरत्न शाक्य व शताब्दी पुरुष डा.जोशीया म्ह्याय् कावेरी जोशी लगायतं मंकाः कथं चिखिफ्यने ज्याझ्वः याःगु खः ।

सफू चिखिफ्यना ज्याझ्वलय् परिषदया दाँभरीं वासुदेव श्रेष्ठं लसकुस न्वचू तयादीगु खः । ज्याझ्वलय् नुगःखँ तयेगु झ्वलय् मूपाहाँ कंसाकार भाजुं मचा साहित्यया विकास धइगु हे भाषा विकासया पूर्वाधार खः धकाः धयादिल ।

अथेहेतुं च्वमि मीना बज्राचार्यं मचा बाखं च्वयेगु ज्याय् थःत शताब्दी पुरुष सत्यमोहन जोशीं इलयब्यलय् न्वाना च्वनादीगु खँ लुमंकाः दिल ।

Categorized in राष्ट्रिय