बाल पोषणया नितिं लगानी याय्माःगुलिइ बः
लहनान्युज | तछलाथ्व एकादशी ११४३, बैसाख १८ सोमवाः
![](https://www.lahananews.com/sites/default/files/IMG_4751.jpg)
११ लाख स्वयां अप्वः मचातय्त बालपोषण भत्ता उपलब्ध जुयाः बालपोषणया अवस्थाय् छुं सुधार दाबी याःगु दु ।
सामाजिक सुरक्षा नागरिक समाज सञ्जालं ग्वसाः ग्वःगु बालअनुदान व बाल पोषण भत्ता विषयक सहलह ज्याझ्वःया वक्तातय्सं थथे दाबी यासें करिव ७५ प्रतिशत न्यादं क्वय्या मचातय् जन्म दर्ता जुयाः बालअधिकार स्थापना याय्त ग्वहालि जूगु धाःगु खः ।
ज्याझ्वलय् अधिकारकर्मी बसन्त राज गौतमं नेपालमा जनसाख्यिक स्वास्थ सर्वेक्षण २०२२ या बः कासें सन २००१ य् एक हजार जन्मय् मृत्यु दर ९१ दुगुलिइ २०२२ तक्कय् प्रति हजार ३३य् कुहांवःगु धयादिल । सञ्जालया नायः तिलोत्तम पौडेलं नेपाल सरकारं बाल पोषणय् लगानी थकाय्त बः बियादिल ।
बालअधिकारकर्मी डा. कृष्ण सुवेदी, कार्यक्रममा युनिसेफका ठाकुर ढकाललिसें नं बालबालिका पोषण भत्ता ७७ जिल्लाय् थ्यंकाः आःया राशी ५३२ यात म्ह्वतिं एक हजारय् थकाय्माःगुलिइ बः बियादीगु खः । ज्याझ्वलय् झिगू स्वयां अप्वः मचातय्गु क्षेत्रय् कृयाशिल सञ्जालत, न्यागू विकासया साझेदार संस्थातलिसें २६ संघसंस्थाया प्रतिनिधितय् ब्वति दुगु खः ।
Categorized in राष्ट्रिय