प्रचार प्रसारया अभावय् ने.सं. छ्यलेमफुत
लहनान्यूज सम्वाददाता | कौलागा नवमि ११३६ (अक्टोबर २४ २०१६)
![](https://www.lahananews.com/sites/default/files/nhoodan1.jpg)
नेपाःया हे गौरव खयाः नं प्रचार प्रसारया अभावं यानाः थम्हं यक्व कुतः यानागु खःसां नेपाल सम्वतयात व्यवहारीक रुपं छ्यले मफूगु प्रधानमन्त्री पुष्पकमल दाहालं धयादीगु दु ।
नायः भीमसेनदास प्रधानया नेतृत्वय् थःत नापलाःवःगु न्हूदँ राष्ट्रिय समारोह समितिया प्रतिनिधि मण्डलयात प्रधानमन्त्री दाहालं देययात हे त्यासा मुक्त दयेकूगु घटनावलिलिसे स्वानाच्वंगु नेपाल सम्वत नेवाःया जक मखु देयया हे गौरव खः धयादिल । देयया नामं स्वनातःगु सम्वतयात सकल नेपाःमिया गौरव तायेकाः थम्हं राष्ट्रिय सम्वत घोषणा यानागु खःसां प्रचार प्रसारया हे अभावं व्यवहारय् छ्यलेत थाकूगु दाहालं धयादिल ।
नेवाःतयसं जक प्रचार यानाच्वंगु व न्हूदँ न्यायेका वयाच्वंगुलिं थौंकन्हय् नेपाल सम्वत नेवाःतयगु थें जक खने दयाच्वंगु धासें प्रम दाहालं आः थुकियात व्यवस्थित रुपं प्रचार प्रसार याना वनेमाःगु धयादिल । थःगु न्हापाया कार्यकालय् सुयागुं दवाव वा प्रभावं मखसें थम्हं अध्ययन यानाः हे नेपाल सम्वतयात राष्ट्रिय सम्वत घोषणा यानागु दाहालया धापू खः ।
न्हूदँ राष्ट्रिय समारोह समितिया नायः भीमसेनदास प्रधानं धाःसा राज्यं राष्ट्रिय सम्वत घोषणा याःसां सरकारी स्तरं हे व्यवहारय् मछ्यलाच्वंगु खँ तयादिल । लिसें नायः प्रधानं समितिपाखें नेपाल सम्वतयात बैंकया चेकय् छ्यले दयेमाःगु, नोटय् छ्यलेमाःगु, नेपाल सम्वत अध्ययन प्रतिष्ठान दयेकाः थुकिया अध्ययन न्ह्याकेमाःगु, राष्ट्रिय विभूति शंखधर साख्वाःया व नेपाल सम्वतया विषय पाठ्यक्रमय् दुथ्याकेमाःगु, नेपाल सम्वत न्हूदँ राज्य स्तरं हनेमाःगु, कोषया व्यवस्था यायेमाःगु लिसेंया माग दुथ्याःगु ज्ञापनपौ प्रम दाहालयात लःल्हानाद्यूगु खः ।
प्रम दाहालयात नापलायेत थौं प्रधानमन्त्री ज्याकू, सिंहदरवारय् न्हूदँ राष्ट्रिय समारोह समितिया नायः प्रधान, दुजःपिंलिसें सल्लाहकारपिं लक्ष्मीदास मानन्धर, डा.रत्नकमल वैद्य, पूर्वमन्त्रीपिं कृष्णगोपाल श्रेष्ठ, राजेन्द्र महर्जन, दिलिप महर्जन लिसेंया पुचः थ्यंगु खः ।
![](http://lahananews.com/sites/default/files/pictures/nhoodan.jpg)