यल महानगरपालिका– १६ वडा कार्यालयया बाल अधिकार समितिया ग्वसालय् जूगु न्ह्यन्हुयो उद्घोषण व व्यक्तित्व विकास तालिम मंगलबाः क्वचाःगु दु।

यलय् हःखा बहाः रत्नाकर महाविहारया हलय् उगु तालिम जूगु खः। उगु ज्याझ्वलय् यल महानगर १६ वडाध्यक्ष निर्मलरत्न शाक्यं तालिमय् सयकाःगु ज्ञान, सीपयात व्यवहार लागू यायेत न इनाप यानादीगु खः। ‘गुलि छ्यलं, उलि हे छिकपिन्स न्ववायेगु क्षमताय् बालाना वइ धका धयादीगु खः।

उगु ज्याझ्वःया समितिया संयोजक वडा सदस्य बबिता श्रेष्ठं फुसर्दया ई मस्तयसंं मोबाइल स्वयेगु स्वया थीथी अतिरिक्त क्रियाकलाप व रचनात्मक गतिविधिइ सहभागी जुउसा बालाइ धका धयादीगु खः। तालिमय् मस्तय्गु सहभागितां थः तसकं उत्साहित जुयागु दु धका कार्यपालिका सदस्य तक जुयादीम्ह श्रेष्ठं थुगु ज्याझ्वःपाखे वःगु प्रतिक्रिया, अनुभवं सयका मस्तयेगु माग व चाहनायात ध्यानय् तया मेगु अझ बालागु ज्या यानावनेगु प्रतिबद्धता प्वकादीगु खः। तालिमय् उद्घोषणकला, न्ववायेगु प्रस्तुती, खुगु ‘क’ (के, किन, को, कहाँ, कहिले, कसरी), सैद्धान्तिक ज्ञानया नापं उकियात च्वयेगु, न्ववायेगु कुतः याकगु धका प्रमुख प्रशिक्षक सरिना बज्राचार्यं धयादीगु खः। शुरुइ २० निसे २५ म्ह जक लक्षित याना न्ह्याकूगु ज्याझ्वः मस्तयेगु शैक्षिक सत्र २०७९ या समापन लिपा तालिमय् ५० म्ह स्वया अप्पोसिया ब्बति काःगु दु धका धयादीगु खः।

उगु ज्याझ्वलय् नेवाः पत्रकार राष्ट्रिय दबूया वरिष्ठ उपाध्यक्ष सुनील महर्जनं तालिमय् सहभागी मस्तय्त थःपिन्स सयकाःगु खुगः ‘क’ यात सफू ब्बनेगु इलय्, चाःह्यू वनेगु इलय् न लागू यायेफइ धका धयादीसे थुकिइ मस्तय्सं मौलिक नाप सिर्जनात्मक बिचाःया विकास यायेत ग्वाहालि जुइ धका बिचाः तयादीगु खः।

Categorized in राष्ट्रिय