मचातय्त लक्षित यानाः यल महानगरपालिका– १६ वडा बालअधिकार समितिं आईतबाः व्यक्तित्व विकास लिसें उद्घोषण तालिम याःगु दु ।

यलया हःबहाःस्थित रत्नाकर महाविहारया सामुदायिक भवनय् न्ह्याःगु तालिमया यल महानगरपालिका– १६ या वडाअध्यक्ष निर्मलरत्न शाक्यं उलेज्या यानादिल । थःगु नुगःखँ तय्गु झ्वलय् वडाअध्यक्ष शाक्यं न्ववाय्गु बानी, तरिका, व सम्बन्धी सैद्धान्तिक व व्यवहारिक ज्ञान व्यक्तित्व विकासया अनिवार्य तत्व खःगु धयादिल ।

समितिया कजि लिसें वडाया महिला सदस्य बबिता श्रेष्ठं मचातय्गु बाल विकासया अधिकार, सहभागिताया अधिकारयात केन्द्रबिन्दुइ तयाः ज्याझ्वःया ग्वसाः ग्वयावयागु जानकारी बियादिल । १२ दँनिसें १६ दँतक्कया २०म्ह लक्षित यानाः ज्याझ्वः याय्गु बिचाः दुगुलिइ सहभागीया ३५ हाराहारीइ थ्यंगुलिं मचा लक्षित ज्याझ्वःया आवश्यकता व महत्व अझ अप्वःगु सीदुगु कजि श्रेष्ठया धापू खः ।

व इलय् रत्नाकर महाविहार संरक्षण समितिया दुजः कर्ण बज्राचार्यं मचातय्के दुने सुलाच्वंगु प्रतिभा पिब्वय्त थुकथंया ज्याझ्वलं ग्वहालि जुइगु विश्वास प्वंकादिल ।

अथे हे, नेपाल समाचारपत्रका सहायक सम्पादक सुनील महर्जनं मचात स्वभावं हे यक्व सय्केगु क्षमता ज्वनावइगु जूगुलिं स्थानीय तहं बालमैत्री परिवेशय् व क्षमताया भरपुर सदुपयोग याय्गु नीति, कार्यक्रम हय्माःगुलिइ बः बियादिल । न्हय्न्हुतक्क जुइगु उगु तालिमया मुख्य प्रशिक्षक सरिता बज्राचार्य व ग्वहालिमिया रुपं प्रेरणा बज्राचार्य दु ।

Categorized in राष्ट्रिय