‘एक कप चिया दान अभियान’या १३क्वःगु दँमुँज्यां हंगु दु ।

न्हिं छगू कप च्याया मू बराबरया धेबा दान यानाः व बापतया धेबा असहाय दीनदुःखीतय्गु मिखाया वासः याय्गु आज्जुं स्थापित अभियानया १३क्वःगु दँमुँज्या हंगु खः ।

युवा नेत्र सेवाया ग्वसालय् याःगु दँमुँज्या ज्याझ्वलय् साहित्यकार डा.नवराज लम्सालं समाज सेवाया क्षेत्रय् युवा नेत्र सेवाया भूमिकायात च्वछासें थःगु बिचाः तयादिल । संस्थाया नायः नेत्र विशेषज्ञ सिद्धार्थ रञ्जितं गरिब असहाय दीनदुःखीया लागिं न्हिं छगू कप च्याया मू ज्वलिंज्वःया धेबा दान याइपिं ग्वहालिमिया ल्याः अप्यावंबलय् थःपिन्त थप हःपाः चूलाःगु धयादिल ।

ज्याझ्वलय् न्हूपिं आजीवन दुजःलिसें संस्था व अभियानयात ग्वहालि याःपिं थीथी व्यक्तित्वतय्त हंगु खः । ज्याझ्वलय् सुरेन्द्र प्रसाद ढकाल प्रतिष्ठानं समाजय् थःगु सेवायात विस्तार यानायंकेत धासें दँय् ३०द्वः तका ग्वहालि याय्गु घोषणा याःगु खः । डा. सविता श्रेष्ठं संस्थाया कोषय् १ लाख २० हजार तका ग्वहालि बियादिल ।

भामा सेवाया छ्यान्जे रोशन राज महर्जनं वार्षिक कार्य प्रगति प्रतिवेदन व दांभरिं शर्मिला डंगोलं आर्थिक प्रतिवेदन न्ह्यब्वयादिल । ज्याझ्वलय् नेपालया ‘मिखाया मणि’ रुपं म्हस्यूम्ह प्रा. रामप्रसाद पोखरेलया उपस्थिती दुगु खः । २७ न्ह्यः स्थापित सेवां १३ दँ मिखा उपचारया लागिं “एक कप चिया दान अभियान” न्ह्याकूगु खः । सेवाय् आःतक्क ३सःत्या स्वयां अप्वः दुजः व सच्छि स्वयां अप्वः देशबिदेशया आजीवन दुजः दु ।

अभियान अन्तर्गत यलया थेच्व, सुनाकोठी, चन्द्रागिरी नगपालिका, बलम्बु, नगरकोटलिसें किपुलिइ निःशुल्क मोतिबिन्दु शल्यक्रिया, मिखा परिक्षण शिविर न्ह्याकेधुंकूगु दु ।

Categorized in राष्ट्रिय