नवनियुक्त मन्त्रीपिन्स पद व गोपनीयताया शपथ काःगु दु। राष्ट्रपति भवन शीतलनिवासय् जुगु ज्याझ्वलय् राष्ट्रपति रामचन्द्र पौडेलं नवनियुक्त मन्त्रीपिन्स शपथ काःगु खः।

प्रधानमन्त्री पुष्पकमल दाहाल प्रचण्डं कांग्रेसया सिफारिसय् प्यम्ह, नेकपा एकीकृत समाजवादीया निम्ह व माओवादी व जनता समाजवादी पार्टी जसपापाखे छम्ह छम्ह मन्त्रीपिन्त नियुक्त याःगु दु। कांग्रेसया उपसभापति पूर्णबहादुर खड्का उपप्रधान नाप रक्षामन्त्री जुगु दु सा डा. प्रकाशशरण महत अर्थ, रमेश रिजाल उद्योग वाणिज्य नाप आपूर्ति व सीता गुरुङ शहरी विकासमन्त्री जूगु दु।

जनता समाजवादी पार्टी (जसपा) या सिफारिसय् अशोक राई शिक्षा विज्ञान नाप प्रविधिमन्त्री जूयादीगु दु। अथेहे एकीकृत समाजवादीया उपाध्यक्ष वेदुराम भुसाल कृषि नाप पशुपक्षी विकास व उपमहासचिव प्रकाश ज्वाला भौतिक पूर्वाधार नाप यातायातमन्त्री नियुक्त जूगु दु। माओवादी केन्द्रपाखे उपमहासचिव शक्ति बस्नेत ऊर्जा, जलस्रोत नाप सिंचाइ मन्त्री जूगु दु।

अथेहे लोकतान्त्रिक समाजवादी पार्टीया वरिष्ठ नेता शरतसिंह भण्डारी श्रम, रोजगार नाप सामाजिक सुरक्षा मन्त्री जुयादीगु दु सा नागरिक उन्मुक्ति पार्टीया अध्यक्ष रञ्जिता श्रेष्ठ चौधरी भूमि व्यवस्था, सहकारी नाप गरिबी निवारण मन्त्री व नेपाल समाजवादी पार्टीया अध्यक्ष जुयादीम्ह महिन्द्रराय यादव महिला, बालबालिका नाप ज्येष्ठ नागरिक मन्त्री जुयादीगु खः। नवनियुक्त मन्त्रीपिन्स थौं हे शपथ काःगु दु।

उपप्रधानमन्त्री नारायणकाजी श्रेष्ठया धाःसा मन्त्रालय ह्यूगु दु। पुस ११ गते भौतिक पूर्वाधारमन्त्री जुयादीगु खःसा आः गृह मन्त्रालयया जिम्मेवारीइ दु।

जनमत पार्टीया अब्दुल खानं सहमति कथं उद्योग मन्त्रालयया जिम्मेवारी मबिइवं खानेपानी मन्त्रीपाखे राजीनामा बिःगु दु।

Categorized in राष्ट्रिय