ज्वेल्स् सहकारीपाखें स्वास्थ्य शिविर
लहनान्युज | चौलाथ्व सप्तमी ११४३, चैत्र १३ मंगलवाः
ज्वेल्स् बचत तथा ऋण सहकारी संस्था लिमिटेडं सोमवाः यलया तबहालय् बृहत निःशुल्क स्वास्थ्य शिविर ग्वसाः ग्वल ।
लाईफ लाइन हेल्थ होम केयरया सहकार्य व काठमाडौं मेडिकल कलेजया प्राविधिक ग्वाहालिं ज्वेल्सं उगु ज्याझ्वः ग्वसाःग्वःगु खः ।
उगु शिविरय् ब्वतिकाःपिन्त वा, जनरल शल्यक्रिया, मचा ल्वय्, मिखा, न्हाय्, न्हाय्पं व कथु, हाडजोर्नी व नशा सम्बन्धी, मिसा ल्वय्या परीक्षण याकूगु खः । उकियालिसें भिडियो एक्सरे, इ.सि.जि याकेगु व्यवस्था याःगु खः ।
शिविरय् थ्यंमथ्यं प्यसः म्हेसिनं स्वास्थ्य परीक्षण याकूगु सहकारीया कोषाध्यक्षतकं जुयाच्वनादीम्ह ज्याझ्वः कजि प्रज्ञारत्न शाक्यं कनादिल ।
परीक्षण याकूपिं ५० दँ पुलेधुंकूपिं मिसातय् ल्याः यक्व दुगु खः ।
स्वास्थ्य परीक्षण याकूपिन्त लिपा काठमाडौं मेडिकल कलेजय् थप वासः याकेमाःसा लाइफ लाइन हेल्थ होम केयरया माध्यमं ३० प्रतिशत छुट व शल्यक्रियाय् ५० प्रतिशत छुट बीगु घोषणा याःगु खः ।
शिविरं मध्यम व निम्नमध्यम वर्गय् नियमित स्वास्थ्य परीक्षणया आवश्यकता बोध याकेगु लिसें स्वस्थ जुया च्वने माःगु खँय् सजगता अप्वय्कूगुलिं शिविर सफल दय्केत समन्वयकारी भूमिका निर्वाह यानादीम्ह समाजसेवी मोतिशान्ति शाक्यं कनादिल ।
Categorized in राष्ट्रिय
