चैत्र ३ गते किपुलिइ नमुना सफाई अभियान न्ह्याकीगु
लहनान्युज | चिल्लागा त्रयोदशी ११३८ (मार्च १५ २०१८)
१ घण्टां १०० रोपनी जग्गाय् फोहर सफा यायेगु अभियान किपुलिइ वइगु चैत्र ३ गते शनिवाः न्ह्याकीगु जूगु दु । किपू नगरपालिका स्वास्थ्य तथा फोहरमैला व्यवस्थापन समितिया ग्वसालय् नेवाः एफ एम, नेवाः लहना व पर्यटन सुचना केन्द्रया ग्वहालिई उगु अभियान न्ह्याकेत्यंगु खः ।
किपू ध्वाखा लोकतान्त्रिक चोकंनिसें दिप तकया लागाय् सफाई अभियानय् मानविय फोहरयात सफा यायेगु जुइ धकाः नं धाःगु दु । किपूया ख्वाः जुयाच्वंगु पूर्व, उत्तर व दक्षिणपाखेया लागाय् थुलि तःजिक यक्व मनूत सहभागी जुया न्हापांखुसि सर सफाई यायेत्यंगु खः ।
सुथय् ७ बजेनिसें ८ बजे तक जम्म एक घण्टा न्ह्याइगु उगु सर सफाई अभियानय् स्वद्धःम्हसिबें नं अप्वः किपूमित सहभागी जुइगु किपू नगरपालिका फोरह मैला व्यवस्थापन समितिया कजि नापं किपू नगरपालिका वडा नं. १ या नायः हर्ष महर्जनं धयादीगु दु । किपुलिइ क्रियाशिल जुयाच्वंगु मिसा पुचः, खलः पुचःनिसें थीथी ख्यलय् क्रियाशिल जुयादीपिं किपूमत सहभागी जुयादी धकाः नं वय्कलं कनादीगु दु ।
विहिवाः किपूया थांबहाः त्वालय् जूगु पत्रकार भेटघाट ज्याझ्वय् किपू नगरपालिका वडा नं. २ या नायः रमेशमान महर्जनं किपूयात पर्यटकीय क्षेत्रया रुपय् विकास यायेगु नितिं नं उगु कथंया सर सफाई अभियान न्ह्याकेगु ज्या यानागु खः धयादिल । ज्याझ्वलय् नेवाः लहना विश्व सफाई अभियान्ता राजमान महर्जनं किपूया च्यय्गूलिं मल्याक खलः पुचःपाखें द्धलंद्धःम्ह मनूत सहभागी जुयादीगु उगु सर सफाई अभियान धइगु छगू कथं उत्सवया रुपय् हनेगु जुइ धयादिल ।
अभियानया प्रचारप्रसार कजि पर्यटन सुचना केन्द्र किपूया विरेन्द्र विणु शाक्यं न्ह्याकादीगु उगु ज्याझ्वलय् नेवाः एफ एमया प्रबन्ध निर्देशक श्रीकृष्ण महर्जनं थुगु अभियान धइगु किपूया अभियान जसां नं नेपाःया नितिं हे सर सफाईया नितिं छगू न्हूगु अभियान जुइ धकाः धयादिल ।
किपू नगरपलिका वडा नं. ३ या नायः राजेन्द्र महर्जन, वडा नंं १० या नायः अमन महर्जन, नेवाः लहना विश्व सर सफाई अभियानया अभियान्ता सुशिला महर्जनं नं सहभागी जुयादीगु उगु पत्रकार सम्मेलनय् चैत्र ३ गते सांस्कृतिक बाजं सहित ज्वना वना सर सफाई यायेगु जुइ धकाः ग्वसाः खलकं जानकारी बिउगु दु ।
