रत्न राज्यलक्ष्मी क्याम्पसया स्नातक स्वंगूगु दँया नेपालभाषा ब्वनामिपिं व गुरुपिनिगु मंकाः कुतलय् बिदाई ज्याझ्वः सोभिनियर ग्यालरी सभाहल सोल्टिमोडय् शुक्रवाः जूगु दु ।

उगु ज्याझ्वलय् रत्न राज्यलक्ष्मी क्याम्पसय् वि.सं.२०७४ व २०७५ सालय् बि.ए. तहलय् नेपालभाषा पुनर्स्थापनाया कदर कथं व मूपाहाँ पूर्व क्याम्पस सहायक प्रमुख गोविन प्रसाद आचार्य, नेपालभाषा स्यनामि प्रा.डा. चन्द्रमान बज्राचार्य, नेपालभाषा शिक्षकपि मदनसेन बज्राचार्य, श्रीमिला सुवाल, अनुपसिंह सुवालपिन्स रितेश मल्ल, सोमी डंगोल, प्रशान्त डंगोल, इन्द्रमान महर्जन, सुरोज तन्दुकार लिसेंया  ब्वनामिपिन्त मतिनाया चिं लः ल्हानादीगु खः ।

ज्याझ्वलय् पाहाँ बज्राचार्यं बि.ए तहलय् नेपालभाषा विषय कया ताःलाकादीपिन्सं सकारात्मक सोँच तयाः न्ह्यःचिलेमाःगु खँय् बः बियादिल । लिसें सुवालं नेपालभाषा अभियान कक्षा पुनर्स्थापना यायेत जीवन पानाः दीपिं ब्वनामिं व स्यनामिपिनिगु मंकाः कुतलय् ताःलाःगु ऐतिहासिक ज्या जूगु धकाः नुगःखँ प्वंकादिल । ज्याझ्वःया मूपाहाँ रत्न राज्यलक्ष्मी क्याम्पसया पूर्व क्याम्पस सहायक प्रमुख गोविनप्रसाद आचार्यं तसकं नाजुक अवस्थाय् थ्यनाच्वंगु नेपालभाषा कक्षा वि.सं. २०७४ सालय् बि.ए. तहलय् पुनर्स्थापना व एम.ए. मास्र्टस् कक्षा न्ह्याकेत प्रशान्त डंगोल व रिदेन महर्जनया पुचलं ज्वःमदुगु योगदान बियादीगु धकाः नुगःखँ प्वंकादिल ।

श्रीजनमान श्रेष्ठया सभाध्यक्षताय् जूगु उगु ज्याझ्वलय् सोमी डंगोल, नेपालभाषा स्यनामि प्रा.डा. चन्द्रमान बज्राचार्यपिन्स न नुँगः खँ तयादीगु खः।

Categorized in राष्ट्रिय