उपराष्ट्रपति पद निर्वाचनया लागि उम्मेदवारपिनिगु लिपागु नां थौं प्रकाशन याइगु जुगु दु।

थौं बहनि ५ बजे दुने उम्मेदवारपिनिगु लिपागु नां प्रकाशन जुइ धका निर्वाचन अधिकृतया कार्यालयं धाःगु दु। उपराष्ट्रपति पदया लागि सत्ता साझेदार दलपाखे स्वम्ह व नेकपा एमालेपाखे छम्ह याना प्यम्हेसिगु म्हिगः शनिबाः उम्मेदवारी वःगु खः।

गठबन्धन दलपाखे जनता समाजवादी पार्टीया रामसहायप्रसाद यादव व प्रमिला कुमारी यादव नाप जनमत पार्टीया ममता झा न उम्मेदवारी बिःगु खः। नेकपा एमालेपाखे उपाध्यक्ष अष्टलक्ष्मी शाक्यं उम्मेदवार बिःगु खः।

रामसहायप्रसाद यादवया उम्मेदवारी खारेजीया मागयासे अष्टलक्ष्मी शाक्य व ममता झा न निर्वाचन आयोगय् उजुरी बिःगु खः। राष्ट्रपतिइ मिजंम्ह उम्मेदवार रामचन्द्र पौडेल निर्वाचित जुइ धुकुगुलि उपराष्ट्रपतिइ मिजंम्ह उम्मेदवार जुइ दइमखु धका उजुरी बिःगु खः।

उपराष्ट्रपतिया निर्वाचन सम्बन्धय् थौं सुथय् निर्वाचन अधिकृतया कार्यालय वना कानुन व्यावसायीपिन्स ध्यानाकर्षण पौ लःल्हायेत्यःगु दु।

Categorized in राष्ट्रिय