लुँवहःया तिसा दयेकेगु तालिम बीगु भवन उलेज्या जूगु दु। काठमाडौं सुनचाँदी व्यवसायी संघं थःपिनिगु निगूगु भवन कथं येँ महानगरपालिका १७ वडा कुसुमबियालाछिइ दयेकूगु भवनयात ‘तिसा दयेकेगु तालिम भवन’ कथं संचालनय् हयेत्यंगु खः।

भवनया उलेज्या थौं शनिवाः जनकवि दुर्गालाल श्रेष्ठ व नेपाल सुनचाँदी व्यवसायी महासंघया अध्यक्ष माणिकरत्न शाक्यं मंकाः कथं रिबन चानाः यानादीगु खः। उलेज्याझ्वलय् न्ववानादिसें संघया अध्यक्ष सुरेश शाक्यं लुँवहया तिसा दयेकीपिं विदेशी कालिगढपिंत विस्थापित यायेगु ताःतयाः हे संघं तालिम संचालन यायेत्यनागु खँ धयादिल । वय्कलं धयादिल, ‘थौंकन्हय् झीथाय् झीगु आधुनिक तिसा जक मखु परम्परागत तिसा दयेकीपिं तकं स्वदेशी कालिगढत मदयेधुंकल ।

थज्याःगु अवस्थायात वाःचायेकाः संघया झिंप्यक्वःगु साधारण सभां हे स्वदेशी कालिगढ उत्पादन यायेगु लक्ष्य क्वःछिनागु खः। थ्व लक्ष्य कथं स्वदेशी दक्ष कालिगढ उत्पादन यायेत थ्व भवन दयेकागु खः ।’ तिसा दयेकेगु तालिमयात अन्तर्राष्ट्रिय रुपं मान्यता नं दयेकेगु निंतिं प्राविधिक शिक्षा तथा व्यावसायिक तालिम परिषद (सिटीइभिटी)पाखें नं सम्बन्धन कयातये धुंकूगु दु।

थुगु भवनय् तालिम कक्षा लिसें प्रयोगशाला, बैठक क्वथा, विश्राम क्वथा, क्यान्टिन नं दइगु खँ भवन निर्माण समितिया कजि व संघया निर्वतमान अध्यक्ष महेन्द्ररत्न शाक्यं जानकारी बियादिल । भवन दयेकेगु निंतिं विद्यासुन्दर शाक्य मेयर जुयाच्वनादीगु इलय् हे येँ महानगरपालिकां ७२ लाख तका दां ग्वाहालि बिउगु खः।

उलेज्या झ्वलय् न्ववानादिसें बागमति प्रदेशया सांसद हरिप्रभा खड्गी लुँ वहःया तिसा थेंज्याःगु व्यावसायिक रुपं महत्वपूर्ण ख्यलय् तालिम बीफत धाःसा ल्याय्म्ह पुस्ता विदेश पलायन जुइमाली मखु धासें संघया तालिम बीगु कुतलं विदेशय् वनाच्वंपिं ल्याय्म्हतय्त नं स्वदेश लिहां वयेत प्रोत्साहित याइगु खँ धयादिल ।

अथेहे रत्न–कुसुमया अध्यक्ष सानुराजा शाक्यं स्वनिगःया वैभव जुयाच्वंगु लुँवहःया तिसा दयेकेगु ज्याय् स्वदेशी कालिगढतय् आवश्यकता वाःचायेकाः तालिम केन्द्र संचालनय् हःगुलिं संघया सकल पदाधिकारीपिंत सुभाय् धयादिल ।

संघया ल्युदांभरिं प्रमिल स्थापितं न्ह्याकूगु ज्याझ्वलय् महासंघया पुलांपिं अध्यक्षपिं मणिरत्न शाक्य, निरञ्जन शाक्य, तेजरत्न शाक्यलिसें सिटिइभिटीया प्रतिनिधि, संघया दुजःपिनि उपस्थिति दुगु खः ।

Categorized in राष्ट्रिय