भाषा, संस्कृति व सम्पदा संरक्षणनाप स्थानीय सरोकारया विषययात सम्बन्धित निकायपाखे सम्बोधन यायेत सञ्चारमाध्यमया भूमिका महत्वपूर्ण दु धका छगु ज्याझ्वलय् न्ववानादीगु दु।

ताम्रकार समाजं शुक्रबाः जुगु छगु ज्याझ्वलय् नेवाः पत्रकार राष्ट्रिय दबूया न्हुगु ज्यासना पुचःयात लसकुस नाप म्हसिका कालबिल ज्याझ्वः जूगुलि अथे धयादीगु खः। उगु ज्याझ्वलय् समाजया अध्यक्ष विनोद ताम्रकारं नेपाल भाषा, संस्कृति, सम्पदा व मौलिक परम्पराया ल्यकेगु नाप राज्यया गलत नीति सरोकारवालापिन्त वास्ता मयागुलि निर्णयया कारण पिहावःगु समस्यानाप ल्वायेत सञ्चारमाध्यमया तधःगु भूमिका महत्वपूर्ण जूगु दु धका धयादीगु खः।

‘सतक विस्तारया भ्वलय् ताम्रकारपिनिगु कुलद्यः उग्रचण्डीमाई द्यःया थासय् अतिक्रमण मयाकेत समाजं याःगु विरोध, भुखाचं स्यंगू देगः पुनःनिर्माण, ग्यास मूया समाजया सदस्यपि मदुपिन्त क्षतिपूर्ण कायेगु ज्या समाजया थीथी गतिविधिइ सञ्चारमाध्यमया भूमिका ग्वाहालि दु ।’ समाजया विकासय् सञ्चारमाध्यमया भूमिका महत्व दुगु उदाहरण बियादीसे अध्यक्ष ताम्रकारं अथे धयादीगु खः।

उगु ज्याझ्वलय् समाजया निर्वतमान अध्यक्ष रवीन्द्रराज ताम्रकारं समाजय् थःगु उद्देश्य कायेगुलि सञ्चारमाध्यमं यःथु योगदनया प्रशंसा यानादीसे समाजया चकःगु दृष्टिकोण तया दक्को नाप सहकार्य यानावया च्वनागु दु धका धयादीगु खः। समाजं ताम्रकारपिनिगु जक मखु सकल नेवाः समुदाय व राष्ट्रया हितया भावना कथं ज्या जुयावया च्वंगु दु धका धयादीसे निर्वतमान अध्यक्ष ताम्रकारं राज्य, स्थानीय तहया गलत नीति, समन्वय मयासे ज्यायाना वनां उकि समस्या समाधानया लागि सञ्चारमाध्यमं गज्याःगु ज्या जुगु धका थःगु अनुभव कनादीगु खः।

नेवाः पत्रकार राष्ट्रिय दबूया केन्द्रीय अध्यक्ष नृपेन्द्रलाल श्रेष्ठं सञ्चारमाध्यम नाप सहकार्य याना वनेगुलि मेगु जातीय समाज न ताम्रकार समाजपाखे सयकेमाःगुलि बः बियादीगु खः। अध्यक्ष श्रेष्ठं धयादीगु दु‘छु न ज्याझ्वः यायेगु न्ह्यः सञ्चारकःमिपि नाप सहलह याना वनेगु निति सञ्चार नीतिइ सहलह यायेगु, सञ्चारमाध्यमनाप स्वापू तयेगु ज्ञान, सीप, सञ्चारकःमिपिन्त प्रोत्साहित यायेगु व समाचारया असरबारे मूल्याङ्कन यायेगु ज्याय् संस्थागत याना वयाच्वंगु दु। थ्व बालागु पक्ष खः।’

पत्रकार दबूया वरिष्ठ उपाध्यक्ष सुनील महर्जनं राज्यया थीथी पदय् च्वनाच्वपि, धनीमानीया स्वार्थ व समुदायया हित ल्वाःगु अवस्थाय् सञ्चारकःमिपिन्स बिचाः याना न्ह्याः वनेगु पत्रकारिताया धर्म कथं न्ह्यावलय् न समुदायया हितयात केन्द्रबिन्दुइ तया पत्रकारिता यायेमाःगुलि बः बियादीगु खः। ताम्रकार समाजया समन्वयकारी छवि, चकंगु चिन्तन व व्यवहार मेमेगु जातीय समाज खलः पुचया लागि उदाहरणीय दु धका वरिष्ठ उपाध्यक्ष महर्जनं धयादीगु खः।

समाजया अध्यक्ष शम्भुगोविन्द्र ताम्रकार, सचिव दिपेश ताम्रकारं विविध भाषाभाषी व समुदाय दुगु देशय् सञ्चारमाध्यमं सकसिगु सः व भावनायात प्रतिबिम्बित यासे वनेमाःगुलि बःबियादीगु खः।

पत्रकार दबू यल जिल्ला मञ्जु बज्राचार्यं पत्रकार दबूया संस्थागत विकासय् समाजया ग्वाहालि लुमकादीगु खः। उगु ज्याझ्वलय् पत्रकार दबूया न्हुगु ज्यासना पुचःयात नेवाः परम्परा कथं ख्यें सगं बिया लसकुस याःगु खः।

Categorized in राष्ट्रिय