प्रधानन्यायाधीश पराजुली पदमुक्त
लहनान्युज | ने.सं. ११३८ चिल्लागा १२ (१४ मार्च २०१८), बुधवाः
![](https://www.lahananews.com/sites/default/files/gopal.jpg)
न्याय परिषदपाखें उमेर हदया हुनिं प्रधान्यायाधीश गोपालप्रसाद पराजुली पदमुक्त जूगु स्पष्ट याःगु दु ।
न्यायपरिषदं सचिवालयस दुगु नागरिकता, शैक्षिक योग्यता, सिटरोल विवरण नापं परीक्षा नियन्त्रण कार्यालय सानो थिमिपाखें थौं बुधवाः हे प्राप्त जूगु पौया लिधंसाय् पराजुलीया उमेर हद पूवनेधुंकूगु जानकारी याकूगु खः ।
परिषदया थौं बुधवाः च्वंगु सचिवस्तरीय मुँज्यां प्राप्त प्रमाणया लिधंसाय् ६५दँ थ्यंगुलिं वंगु साउन २१गतेनिसें अवकाश जुइधुंकूगु जानकारी स्वयं पराजुलीलिसें राष्ट्रपति ज्याकू, संवैधानिक परिषद, प्रधानमन्त्री नापं मन्त्रीपरिषदया ज्याकू, सर्वोच्च अदाललिसें सरोकारवाला निकाययात पत्राचार याःगु दु । सचिव नृपध्वज निरौलाया ल्हाःचिं दुगु पती न्ह्यथनातःगु दु, ‘सम्माननीय महोदयया ६५दँ २०७४साल साउन २१ गते हे पूवनेधुंकूगु खनेदुगुलिं थौं मिति २०७४ फागुण ३० गतेया सचिव स्तरीय निर्णयकथं सम्माननीय महोदय पदय् मदुगु जानकारी बियाच्वना ।’
प्रधानन्यायाधीश पराजुलीया नागरिकताय् फरक फरक जन्ममिति लूगु खः । वय्कःया विवादीत जन्ममितिया विषययात कयाः सर्बोच्चया न्यायाधीशं हे इजलाश बहिष्कार याय्गु ज्या न्ह्यायेधुंकूगु खः ।
Categorized in राष्ट्रिय