पद्मरत्न लुमन्ति गुथिया न्हापांगु तःमुँज्या जुगु दु। नेवाः न्ह्यलुवालिसें मानवअधिकारवादी नेता पद्मरत्न तुलाधरया लमुन्तिइ नीस्वनातःगु गुथिया तःमुँज्यां न्हूगु ज्यासना पुचः नं ल्यःगु खः ।

गुथिया नायः डा. केशवमान शाक्यं उगु ज्याझ्वःया उलेज्या यानादीगु खःसा सुम्निमा तुलाधरं लसकुस यानादीगु खः । तःमुँज्याय् गुथिया छ्याञ्जे नरेशवीर शाक्यं प्रगति विवरण व दांभरिं सुरेश प्रधानं आर्थिक विवरण न्ह्यब्वयादीगु खः ।

तःमुँज्याया झ्वलय् ‘नेपाःया हिउपाः व पद्मरत्न अभियान’ विषयय् सहलह मुँज्या नं याःगु खः । सहलह मुँज्याय् वरिष्ठ साहितयकार तिलकप्रकाश कायस्थ, नेवाः न्ह्यलुवा नरेन्द्रभक्त हाडा व त्रिरत्न शाक्यपिंसं मदुम्ह पद्मरत्न तुलाधरं मानवअधिकारलिसें भाषिक, सांस्कृतिक आन्दोलनया ख्यलय् बियादीगु योगदान व वय्कःया व्यक्तित्वयात कयाः चर्चा यानादीगु खः ।

तःमुँज्यां गुथिया न्हूगु ज्यासना पुचः नं ल्यःगु खः । पुलांगु हे ज्यासना पुचःया निरन्तरता बियाः न्हूगु ज्यासना पुचः ल्यःगु खः ।

Categorized in राष्ट्रिय