नीजि सम्पत्तिइ डोजर न्ह्याकेत छुं कानूनी पत्र वा निर्णय क्यने नं म्वाः
लहनान्युज | पोहेलागा त्रयोद्धशी ११४३, माघ ६ शुक्रवाः
व्यक्तिया विरोध मखु, न त जात, वर्ग, क्षेत्र आदिया हे विरोध खः । थ्व मात्र विसंगतियुक्त प्रवृत्तियागु खँ खः, ज्या क्यनेगु नामय् जुयाच्वंगु स्टन्टबाजीया खँ खः ।
येँ महानगर दुने स्वय्बलय् महानगरपालिकां यक्व हे ज्या यानाच्वंगु दु । फुटपाथ पसः चीकाच्वंगु दु, सार्वजनिक जग्गा कब्जा यानाः च्वनाच्वंपिं सुकुम्वासीयात अनं थनाछ्वय्गु, सार्वजनिक जग्गा खाली याकेगु कुतः जुयाच्वंगु दु । टुकुचा धयातःगु इच्छुमतीयात मालेगु नितिं कुतः यात ।
पार्किङया लागिं भूमिगत तल्ला खाली याकेगु ज्या जुल । मापदण्डं पिने लाःगु टहरा आदि थुज्वःगु अवैध संरचना थुनेगु ज्या जुल । थज्याःगु ज्या गुलि जुल, गुलि जुल । अले थज्याःगु ज्या यानाः येँ महानगर प्रमुख बालेनं खुब वाहवाही नं कमे यात । तर धात्थें, छु ज्या जूगु दु ले सा । व वाहवाही धात्थें आम नागरिकया खः कि युट्युबेतय्सं क्यंगु नौटंकी जक खः ले सा ?
थ्व च्वय्या सकतां ज्या स्वल धाःसा रिजल्ट गुलि वल ले ? मार्कसीट स्वल धाःसा जीरो हे जक खनेदइ । फुटपाथ पसः चीकूगु दु ला धाय्बलय् आः नं सनिलय्पाखे स्वःवन धाःसा न्यूरोड, वंगः एरियाय् फुटपाथ पसःया हे कारणं न्यासिवनेत थाकु । सुकुम्वासीतय्त थनाछ्वय्गु सवालय् राज्यं न्ह्याकूगु प्रकृयाय् वने धकाः भूमि आयोगलिसे सम्झौता यानाः जबरजस्तीया लँ लिनाः मात्र प्रचारबाजी जक याःगु खनेदत । टुकुचाया सवालय् पुरातात्विक महत्वया विषयय् थीमते धकाः अदालतं आदेश जारी याय्माल । पार्किङ धकाः नक्सा पास यानाः पसः तय्कातःगु भूमिगत तल्ला खाली ला याकल तर वयां लिपा छु यात, छु जुयाच्वन छुं हे मतलब मन्त । अनं वल अवैध संरचना थुनेगु खँ । धात्थें छु, अवैध संरचना हे जक थुनाच्वंगु खःला ले ?
न्हापा टहरालिसेंया अवैध संचरना थुनाजुजुं निजी छेँया कम्पाउन्ड वाल थुंबलय् हे कानून व्यवसायीलिसेंया विज्ञतय्सं आः जिएलडीया खँ कयाः नीजि छेँ थुनाहइ धाःगु खः । गथे धाल, आः अथे हे जुल धाय् हे माली । जिएलडीया बः कयाः शंखमूलय् छखा छेँ थुनेगु कुतः जुल, व नं जबरजस्ती । अन्ध समर्थक धाय् वा अन्धभक्ततय्सं ला, सडक क्वत्यलाः दय्कातःगु छेँ थुँ हे थुनी नि धयाबिल । थनथाय् सडक क्वत्यलाः दय्कातःगु छेँ खः कि छेँयात क्वत्यलाः दय्कातःगु सडक धकाः ला स्वय् हे ल्यं दनि । उकिया नापं जिएलडीया नियम कथं विना क्षतिपुर्ति सुयां नं नीजि सम्पत्ति काय् दइमखु ।
सडक वा छुं नं विकास निर्माणया ज्याया नितिं नीजि जग्गा वा छेँ काय्माल धाःसा क्षतिपुर्ति बियाः जक काय्दइ । उलि जक मखु, आः ला सर्वोच्च अदालतं तकं विना क्षतिपुर्ति नीजि सम्पत्ति काय् दइमखु धकाः फैसला तकं याय्धुंकल । तर बालेन सरकारयात थज्याःगु छुं नं फैसला वा निर्णय वा नियमया मतलब मदु । अझ नीजि सम्पत्तिइ डोजर न्ह्याकेत छुं कानूनी पत्र वा निर्णय क्यने नं म्वाः । जिपिं डोजर चले यानाच्वने, निर्णय स्वय्माःसा महानगरपालिकाया अफिसय् हुँ धकाः गुण्डागर्दी हे क्यने थें जबरजस्ती डोजर न्ह्याःवनी । सायद थ्वयात हे धाइगु जुइ बालेन राज ? आः छु धाय्, नय् धुन मखुला ख्येँय् । थुलि हे मखुला
