संघीय संसदया महासचिव डा. भरतराज गौतमं प्रधानन्यायाधीश चोलेन्द्रशम्शेर जबरायात सर्वोच्च अदालत लिहावनेगु लँ चायेका बिःगु दु।

गौतमं थौं बुधबाः राष्ट्रपति कार्यालय, प्रधानमन्त्री कार्यालय, संवैधानिक परिषद, सर्वोच्च अदालत, न्यायपरिषद व जबरायात पौं छ्वया १ फागुन २०७८ य् जबरां कार्य सम्पादन याये मदइगु पौं निष्प्रभावी जूगु जानकारी बिःगु खः। थःत ज्या यायेत रोके मयायेत माग यासे जबरां मंगलबाः जक संसद सचिवालयय् निवेदन बिःगु खः।

\उकिया लिसाः बिइगु झ्वलय् संघीय संसदया महासचिव डा. गौतमं निलम्बन फुकुवा यानाबिःगु खः।वयकलं लिसः बिइगु झ्वलय् धाःगु दु, ‘महाअभियोग प्रस्ताव तत्कालीन प्रतिनिधि सभाय् पेश, प्रारम्भिक छलफल व महाअभियोग सिफारिस समितिपाखे प्रतिवेदन बुझे याःगु तर वया लिपा प्रक्रिया मन्ह्यागु अवस्थाय् २०७९ मंसिरय् न्हुगु प्रतिनिधि सभाया निर्वाचन सम्पन्न जुइ धुकुगुलिं २०७८ फागुन १ य् तत्कालीन इलय् महासचिवपाखे सम्माननीय प्रधानन्यायाधीश चोलेन्द्र शम्शेर जबरां ज्या याये मदइगु व्यहोरा पौ निष्प्रभावी जूगु व्यहोरा जानकारीया लागि इनाप यानागु दुु ।’

सत्तारुढ दलया ९५ म्ह सांसदं जबराविरुद्ध १ फागुन २०७८ य् संसद सचिवालय महाअभियोग प्रस्ताव दर्ता यायेवं २२ फागुनय् प्रतिनिधिसभां महाअभियोग सिफारिस समिति याःगु खः। वया लिपा चोलेन्द्रयात निलम्बित याःगु खः । कार्यवाहक प्रधानन्यायाधीशया रुपय् दीपक कुमार कार्की न ज्या याःगु खः।

कार्कीया अवकाश लिपा आः कायम मुकायम प्रधानन्यायाधीशया जिम्मेवारी हरिकृष्ण कार्की खः।

Categorized in राष्ट्रिय