जागरण मञ्चया संस्थापक दुजः ईश्वर डंगोल मन्त
लहनान्युज | कौलागा अष्टमी ११४२, कार्तिक १ मंगलवाः
![](https://www.lahananews.com/sites/default/files/i_3.jpg)
नेवाः जागरण मञ्चया संस्थापक दुजः ईश्वर डंगोल मन्त। नेवाः जागरण मञ्चया स्थापनाकालनिसें क्रियाशील जुयाच्वंम्ह ईश्वर डंगोल म्हिगः बहनी सोमवाः ११ः३० ता इलय् मन्त ।
वय्कःया छेँजःपिन्सं ब्यूगु जानकारी कथं वय्कः म्हिगः वासः याकेगु झ्वलय् मनमोहन अस्पतालय् मदुगु खः। मदुम्ह डंगोल नेवाः जागरण मञ्चया संस्थापक दुजः खःसा मञ्चं न्ह्याकूगु थीथी ज्याझ्वलय् वय्कः अतिकं सक्रिय व्यक्तित्व खः।
मदुम्ह डंगोल ६३ दँया खःसा वय्कःया अन्तिम संस्कार थौं मंगलवा सुथय् पशुपति दीपय् जूगु दु । मदुम्ह डंगोलया जहानलिसें निम्ह म्ह्याय् व छम्ह काय् दी।
Categorized in राष्ट्रिय