न्हूदँ राष्ट्रिय समारोह समितिं येँ महानगरया मेयर व उपमेयर नापलात
लहनान्युज | कौलागा तृतीया ११४२, असोज २६ बुधवाः
![](https://www.lahananews.com/sites/default/files/1143_0.jpg)
नेपाल संवत् न्हूदँ राष्ट्रिय समारोह समिति ११४३ ब्यवस्थापन समितिया दुजःपिन्सं थौं येँ महानगरपालिकाया मेयर बालेन शाह व उपमेयर सुनिता डंगोलयात नापलानाः ध्यानाकर्षण पौ लःल्हाःगु दु।
थौं बुधवाः समारोह समितिया नायः प्रा.डा. नरेशमान बज्राचार्यया नेतृत्वय् वंगु पुचलं बिस्कं बिस्कं मेयर शाह व उपमेयर डंगोलयात नापलानादीगु खः । थथे नापलायेगु झ्वलय् मेयर शाह नं समारोह समितिं ब्यूगु ज्ञापन पौ लःल्हाना कासें ध्यानाकर्षण पतिइ न्ह्यथनातःगु नेपाल संवतयात कयाः यायेमाःगु सकतां ज्या येँ महानगरपालिकां यायेगु बचं बियादीगु खः ।वय्कलं नेपाल संवत् नेपाःया मौलिक संवत् जूगुलिं थुगु संवतं नेपाःयात म्हसीका बियाच्वंगु विचाः नं प्वंकादीगु खः।
अथेहे, उपमेयर डंगोलं नं समारोह समितिया दुजःपिं नापलायेगु झ्वलय् नेपाल संवतयात कयाः येँ महानगरपालिकां उच्च सम्मान यायेगु कथं ज्या यानायंकेगु बचं बियादीगु खः । समारोह समितिं न्ह्यब्वःगु ध्यानाकर्षण पतिइ महानगरपालिकां न्हूदँया लसताय् तःजिक नगरबासीपिन्त भिंतुना देछायेगु नितिं भिंतुना विज्ञप्ति पिथनेगु, महानगरस्तरीय भिंतुना कालबिल ज्याझ्वः यायेगु, महानगरपालिकाया कार्यपालिका बैठकया निर्णय पुस्तिकाय् नेपाल संवत् च्वयेगु, नेपाल सरकारनाप शंखधर प्रतिष्ठान दयेकेगु नितिं महानगरपालिकां पहल यायेगुलिसेंया थीथी खँ न्ह्यथनातःगु दु।
थुगु दँया न्हूदँ ११४३ कछलाथ्व पारु (कार्तिक ९ गते) समारोह समितिं दँय् दसंथें सुथय् ७ ता इलय् बसन्तपुरं भिंतुना ¥याली व ¥याली लिपा भिंतुना सभा यायेत्यंगु दु ।अथेहे, समारोह समितिं न्हूदँया भिंतुना सभा व ¥याली तःजिक हनेगु नितिं थीथी तयारी यानाच्वंगु दु।
Categorized in राष्ट्रिय