मध्यपुरथिमिइ मल्लकालीन हताः थे लुमकेगु कथं थौं खाँ पिहाँवइगु जात्रा सुरु जूगु दु।

लाय्कुया तलेजु द्यःया थाय् द्यः छेँय् खड्ग, तरबार, ढाल, युद्धकवज लगायत मल्लकालीन युद्धय् छ्यलिइगु साधन ज्वना युद्ध कला प्रदर्शन याइगु उगु जात्रा क्वचाःगु दु।

दरबारनाव स्वापू दुगु खाँ पिहाँवइगु जात्राय् गुथीयारपिन्स जामा फिना खड्ग, ढाल व तरबार ल्हातय् ज्वना थीथी त्वालय् तत्कालीन युद्धकला प्रदर्शन याइगु खः। तत्कालीन दरबारपाखे पिकाइगु थुगु जात्रा थहनेया त्वाः इनाए त्वाः, निगु पूखु जुया दिगु भैरव तक व क्वहनेया त्वाः रूपय् दथु त्वाः जुया बालकुमारी तक प्रदर्शन याइ।

थुगु जात्रा मोहनीया नवमी कुन्हु तलेजु द्यःया थाय् बिःगु बलि व कोत दुने द्यः व दरबारया राजदण्डयात दुथ्याका देँय् चाःहिकिइ याइ ।

विशेष याना थुगु जात्राय् नायः पःमां (तत्कालीन दरबारका प्रशासक, श्रेष्ठ थर), कर्माचार्य, जोशी, कुटु, प्याथः (प्रजापति), खड्गी समुदायपि दुथ्याइ।

किपा सुरेश खाक्वः श्रेष्ठ

Categorized in राष्ट्रिय