तेज–तीर्थ पुरस्कार लःल्हात
लहनान्युज | यंलाथ्व पुन्हि ११४२, भाद्र २५ शनिवाः
नेपाली कांग्रेसया वरिष्ठ नेता नापा पूर्व मन्त्री तीर्थराम डंगोलं निस्वनादीगु तेज–तीर्थ पुरस्कार व सम्मान शुक्रवाः छगू ज्याझ्वःया दथुइ लःल्हागु दु।
नेपाली कांग्रेसया नेता वि पि कोइरालाया १०९ क्वःगु बुदिंया लसताय् तेज–तिर्थ ट्रष्टया ग्वसालय् जूगु उगु ज्याझ्वलय् डंगोलया सभाध्यक्षताय् जूगु खः। तेज–तीर्थ पुरस्कार व सम्मान ज्याझ्वलय् मूपाहाँ कथं नेपाःया न्हापांम्ह राष्ट्रपति डा रामवरण यादवं पुरुषोत्तम दाहालयात छगू लखं तकाया मानव अधिकार लोकतन्त्र सिरपा लःल्हागु खः।
अथेहे सन्चारकःमि लोकतन्त्र अभियानया न्ह्यलुवा कबिर राणा, युवा सन्चारकःमि राधिका बुढाथोकीया नापनापं नेपालभाषाया वाङ्गमय व साहित्यया ख्यलय् ज्वमदुगु योगदान बिया वया च्वंपिं साहित्यकार प्रकाश प्रधान, भाषा संस्कृतिख्यलय् काशिनाथ टमोटयात नं तेज–तीर्थ सिरपा लःल्हागु खः । वयकपिन्त म्हतिं न्यय्द्वः न्येयद्वतका सिरपा कथं लःल्हागु खः।
उगु ज्याझ्वलय् तिर्थ राम डंगोलया आत्मवृतान्त सफू नेपाली कांग्रेस र तिर्थ रामया पितब्वज्या नं जूगु खः। आत्म वृतान्त सफूतिइ नेपाली कांग्रेस व थःम्हेसिनं खंगु पक्षयात गथे खः अथे च्वयागु दु धका धयादीसे वयकलं झीगु देशय् राजतन्त्र अथें चिलावंगु मखु उकिया लिउने यक्को बलिदान दु धका धयादीगु खः।
ज्याझ्वलय् सिरपा ज्याझ्वःया कवःया कजि पूर्व मन्त्री भिमसेनदास प्रधानं सम्मानित व्यक्तित्व पिनिगु परिचय बियादीगु खःसा सम्मानित व्यक्तित्वपिंपाखें पुरुषोत्तम दाहाल व काशिनाथ टमोट पिन्सं थःगु नुगःखँ तयादिगु खः।
Categorized in राष्ट्रिय