लहना वाःपतिं कासा ख्यःयात थाय् बियाच्वनेमा
हिमेश, कान्तिपुर न्हिपौ | यंलाथ्व एकादशी ११४२, भाद्र २१ मंगलवाः
![](https://www.lahananews.com/sites/default/files/field/image/lahana-400-logo_3.jpg)
दकले न्हापां लहना वाःपौयात यक्व यक्व भिन्तुना । धाइ नापं दु, पत्रिका पिकाय्गु अःपु, उकियात निरन्तरता बीत थाकु । लहना प्यसः ल्याः थ्यंगु दु, थ्व लसताया खँ हे जुल ।
म्हिगः म्हीगः थें हे च्वं, लहना पिकाय्गु जुल धकाः पास नृपेन्द्र श्रेष्ठनाप खँ जूगु । आः वय्कलं हे प्यसः ल्याः थ्यनीगु जुल धकाः न्ह्यइपुसे च्वंगु खँ न्यंकादिल । भलसा दु, गनं गुब्लें छुं कथंया दिपाः वइमखु । थ्व वाःपौयात कयाः जित दकले यःगु पक्ष धयागु थ्वं कासा ख्यःयात बिया वयाच्वंगु थाय् खः ।
अप्वः यानाः ल्याय्म्ह ल्यासेतय्त कासा ख्यः तसकं यया च्वनी । झीगु जक मखु, विश्व कासा ख्यलय् हे छु जुया च्वन धकाः नुगः ब्वय्का च्वनी । छगू कथं नेवाः ल्याय्म्ह ल्यासेतय् नं अधिकार खः, कासा ख्यःया बुखँ व च्वसु थःगु भासं ब्वनेगु । मेगु कथं स्वय्गु खःसा आःयापिं न्हूगु पुस्ताया ल्याय्म्ह ल्यासेतय्त नेपाल भाषां ब्वंकेत थुखेपाखे सालेगु धयागु कासा ख्यः नं छगू बाँलाःगु माध्यम जुइफु ।
लहना वाःपतिं न्ह्याब्ले थें कासा ख्यःयात माक्व थाय् बियाच्वनी धयागु विश्वास याना च्वना ।