प्यसः ल्याःतकया यात्रा लहनाया नितिं अःपूगु पक्कां मखु । यक्व हे हाथ्या, समस्या व मगाःमछिंया सामना यायां लहना थौं थनतक्क थ्यनेत ताःलाःगु खः । थीथी थीथी इलय् थीथी कथंया प्राविधिक समस्या, ह्यूमन इरर आदि ला न्ह्यागुं संचार गृहयात निरन्तर धइथें वयाच्वनीगु समस्या हे जुल । लिसें ७२ सालया भुखाय् व वर्तमान इलं फयाच्वंगु कोरोना महामारीया समस्या तसकं थाकूगु ई खः लहना जक मखु, सकलसिया नितिं तकं । ‘७२ सालया भुखाय्बलय् सकलें ग्यानाः छेँय् नं पिने तिंख्यलय् व मेमेगु चकंगु थासय् च्वनाच्वंगु खः, तर जिपिं मदिना, पत्रिका पिकयां तुं च्वना । कोरोना महामारीया कारणं लकडाउन जूबलय् सकलें छेँय् दुने हे च्वनाच्वंबलय् नं जिपिं सुचं प्रवाह याय्त निरन्तर खटे हे जुयाच्वना’, लहनाया व्यवस्थापक सुरेन्द्रभक्त श्रेष्ठं लहनाया प्यसः ल्याःया लसता हना ज्याझ्वलय् धयादिल, ‘छुं नं अवस्था वा छुं नं समस्यां लहनायात पनेमफु । लहना न्ह्याबलें न्ह्यानातुं च्वन ।

 

थःगु खँ तनेगु झ्वलय् व्यवस्थापक श्रेष्ठं लकडाउनया हे इलय् थःपिन्सं नेवाः टिभिइ समाचारमूलक ज्याझ्वः लहना गतिविधि व साहित्यिक ज्याझ्वः लहना साहित्य न्ह्याकागु नं लुमंकादिल । ई कथं लहना पुचलं अनलाइन माध्यमलिसें टेलिभिजनय् तकं संचारकर्मयात न्ह्यःने यंकागु धासें श्रेष्ठं धयादिल, ‘लहनां न्ह्याबलें ई कथं न्ह्याःवनेमाःगु मान्यता तयातःगु दु । व हे कथं लहनान्यूज डट कम नं झीसं न्ह्याकाच्वनागु दु । लकडाउनय् सकलें छेँय् छेँय् च्वनाच्वंगु इलय् सुरक्षित च्वनाः सुचं कयाच्वने फय्मा धकाः नेवाः टिभिइ नं ज्याझ्वः न्ह्याकागु खः । आः थःगु हे टेलिभिजन न्ह्याकेगु ई वःगु दु ।

 

लहनां आः लहना टेलिभिजन नं न्ह्याकेत्यनागु घोषणा थ्व हे दबुलिं यानाच्वना ।’ समाजसेवी लिसें उद्यमी सूर बहादुर श्रेष्ठया संयोजकत्वय् ३ करोड तकाया लगानीइ लहना टेलिभिजन न्ह्याकीगु जूगु दु । लहनाया प्यसः ल्याःया लसता हना ज्याझ्वलय् हे समाजसेवी श्रेष्ठं लहना टेलिभिजनया सुरुया लगानी कथं २ लाख तका तय्गु घोषणा नं यानादीगुु खः ।

 

उगु हे लसता हना ज्याझ्वलय् न्ववासें संघीय मामिला तथा सामान्य प्रशासन मन्त्री राजेन्द्र प्रसाद श्रेष्ठं पहिचान व स्वशासनया मुद्दा छु खः धकाः आम नागरिकयात बांलाक थुइकाबीत संचारमाध्यमं भूमिका म्हितेमाःगुलिइ बः ब्युसें थ्व भूमिका लहना वाःपतिं बांलाक हे निर्वाह यानाच्वंगु बिचाः तयादिल । अथे हे, येँ महानगरपालिकाया निवर्तमान मेयर विद्यासुन्दर शाक्यं थम्हं स्थानीय पाठ्यक्रम नेपालभाषां लागू यानाबलय् लिसें थीथी विकास निर्मामा व पुनर्निर्माणया ज्या न्ह्याकाबलय् नं म्वाःमदुगु भ्रम न्यंकाः ज्या पनेत स्वःगु इलय् लहनां सहि सूचना सम्प्रेषण यानाः भ्रम चिरे याय्त ग्वहालि ब्यूगु धासें लहनायात सुभाय् देछानादिल ।