मातृभाषा पत्रकारिता इतिहासय् नेवाः पत्रकारिता
सुरजबीर बज्राचार्य | यंलाथ्व एकादशी ११४२, भाद्र २१ मंगलवाः
![](https://www.lahananews.com/sites/default/files/field/image/lahana_10.jpg)
“लहना वाःपौ” छगू दसु जुयाः लूगु दु । नेवाः पत्रकारिता ख्यः व ब्यवसायिकताया खँय् हाथ्या लुयाच्वनी । थुगु लकसय् “लहना वाःपौ” धिसि धाय्क दनाच्वंगु दु । नेवाः नुगः नुगलय् जक मखु, जन्मं नेवाः मखुपिनिगु मिखाय् नं लुयाच्वनीगु ज्या जूगु दु ।
नेपालभाषाया पत्रकारिता इतिहास गौरवं जाः । थ्यंमथ्यं १०० दँया मातृभाषा पत्रकारिता इतिहासय् नेवाः पत्रकारिता ख्यलं देय्या समस्त मातृभाषीतय्गु नितिं नेतृत्व याःगु दु । राणाकालीन व इलय् नेपालभाषाया पत्रिका “बुद्धधर्म व नेपालभाषा” पिथनादीम्ह धर्मादित्य धर्माचार्यया नां गुबले नं लुइ, झी नेवाःतय्गु छ््यं गौरवं धस्वाइ । उकथं हे पत्रकारतय्त छवाः याय्गु ज्या २००८ सालय् नेपाल पत्रकार संघ स्वनादीम्ह नेपाल पत्रकार महासंघया संस्थापक अध्यक्ष सत्यनारायण बहादुर श्रेष्ठया उगु कर्मं नं झीगु नुगः तःफाः यानाब्यू । अझ विकासक्रमय् योगदान बियादीपिनिगु धलखय् लुइपिं नेवाःतय्गु ल्याः छम्ह न्ह्यथनेबहःजू ।
नेपाःया पत्रकारिता ख्यलय् नेवाःतय्गु उकथंया सक्रियता मदूगु जूसा थौंया दिं वय्त अझं आपालं दँ पीमालीगु जुइ । थुलि तःजिपिं नेवाः पत्रकार पुस्ताया योगदान झीसं लुमंके । उगु कर्मं झीगु नुगलय् नं शक्ति जाय्के अले सकलें छवाः जुयाः न्ह्याःवने । थौंया आवश्यकता थ्व हे खः । नेवाः पत्रकार राष्ट्रिय दबूया आज्जुइ लुइगु छगू बुँदा थ्व हे नं खः ।
थुकथं नेवाः पत्रकारिता ख्यलय् अतिकं मेहनत यानाः न्ह्यानाच्वंगु संचार माध्यम बाय् संचारकर्मीतय्गु कर्मया योगदान धइगु नेवाः पत्रकारिता ख्यः तब्या जुइगु हे खः । व ल्याखं लहना वाःपौ ४०० ल्याः पूवंगु लसता, मात्र लहनायागु मखु सकल नेवाः पत्रकारिता ख्यःया लसता खः । थुगु लसताय् अझः अप्वः जः न्हियान्हिथं त्वय्मा, व जलां नेवाः पत्रकारिता ख्यः झःझः धाय्मा । सकलें छवाः जुयाः न्ह्याःवनेगु लँपुइ तिबः जुइमा, थ्व हे भिंतुने ।