नेवाः ख्यलय् छुं ज्या यानाः पलाः धिसिलाकेगु धइगु अःपूगु खँ मखु
रेखा शाक्य (राजमति) | यंलाथ्व अष्टमी ११४२, भाद्र १९ आईतवाः
![](https://www.lahananews.com/sites/default/files/field/image/lahana-400-logo_2.jpg)
लहना वाःपौ ४०० ल्याः थ्यंगु लसताय् सकल पुचःयात भिंतुना । नां कथं वाःपौया महिमा ल्यंका तय्गुलिइ पलाः च्वन्ह्याय्माः । थ्व हे मनंतुना । अथे ला नेवाः ख्यलय् छुं ज्या यानाः पलाः धिसिलाकेगु धइगु अःपूगु खँ मखु, चुनौतिपूर्ण ज्या खः ।
उकथं हे हाकनं नेपालभाषाया थ्व हे छगू जक रंगीन वाःपौ मखूगु हुनिं यानाः सदां बजार व ब्वँमितय् दथुइ प्रतिस्पर्धा जुइगु स्वभाविक खत । अथे खयाः नं ४०० ल्याः तक थ्यनेगु धइगु गुलि थथ्याः, क्वथ्याःया लँपु पार यानाः थ्यन व नं छगू महत्वपूर्णगु खँ खः । लहना वाःपतिइ ईब्यःकथं हिलाः हिलाः वइगु लेख रचनायालिसें वर्तमान अवस्थाया गतिविधिया निरन्तरता खना
व बांलाःगु विषयबस्तु खः । अथे खयां नं न्हापा थें छगू पेज झीगु नेवाः संस्कृति, जात्रा, नखःचखःयात कयाः निरन्तर बिया वनेमाःगु ताय्का च्वना । वाःपतिं लेख, रचनायालिसें माःगु सामग्री मुने थाकूगु खँ जि स्वयम् नेपालभाषाया न्हापांगु रंगीन वाःपौ प्रकाशनय् अप्रत्यक्ष रूपं ब्यवस्थापनंनिसें पिथनेगु तकया जिम्मा कयागु अनुभव दुगुलिं छिकपिनिगु समस्या दुविधा वाःचाः ।
अथे खयाः नं गन संघर्ष अन उपलब्धि धइगु मूलमन्त्रयात लुमंकाः लहना वाःपौ सदां सकल नेवाःतय् नुगलय् च्वनेमा भिं मनंतुना ।