नेपालभाषा केन्द्रीय विभाग, नेपालभाषा माध्यमं उच्च शिक्षाया झ्वलय् त्रिभुवन विश्वविद्यालयया आधिकारीक निकाय। अथवा धाय् सरकारया हे निकाय। थनं नेपालभाषा माध्यमं स्नातकोत्तर तगिंया शिक्षा बियावःगु ४२ दँ दत।

थनिं ४२ दँ न्ह्यः नेपाल सम्वत ११०० स विभागया स्थापना जुयाः थन नेपालभाषा माध्यमं स्नातकोत्तर तगिंया शिक्षा बियावःगु खः । शुरुइ डिग्रि बाइ डेजर्टेसन कथं न्ह्याःगुलिइ आः वयाः थन स्नातकोत्तर तगिंया जक मखसें, एम.फिल पिएच.डी कोर्शया नां नियमित रुपं कक्षा न्ह्यानावःगु दु। एम.फिल. पिएच.डी तगिंया ला आः निगूगु ब्याचया ब्वनेज्या तकं न्ह्याय्धुंकल। दँय्दसं ज्याझ्वः यानाः इलय्ब्यलय् थीथी सिरपाः नं बियावःगु विभागया बुदिं हनेमफयाच्वंगु वा महनाच्वंगु अवस्थाय् उगु थीथी सिरपाः नं दिनाच्वंगु खः। न्हय्दँ लिपा वयाः वंगु सोमबाः बिभागं थःगु ४२क्वःगु बुदिं नं न्याय्कूगु दुसा न्हय्दँ लिपा वयाः पियुष पदक नं ब्यूगु दु।

‘नेपालभाषा जर्नल’ व ‘समाज भाषा विज्ञानया छुं’ सफू तकं विमोचन याःगु ज्याझ्वलय् नेपाल सम्वत ११३६ निसें ११३९ तकया सिरपाः छक्वलं लःल्हाःगु खः। ११३६ या सिरपाः भरत महर्जन, ३७ या राजेन्द्र शाक्य, ३८ या राकेश महर्जन व ३९ या कविन श्रेष्ठयात ब्यूगु खः।

अथे हे, नेपाल सम्वत ११३७ निसें ११३९ तकया योगवीरसिं अनुसन्धान वृत्ति नं लःल्हाःगु दु। व हे कथं स्नातकोत्तर तगिमय् न्हाप, ल्यू व लियांल्यू लाःपिन्त बीगु श्रेष्ठ पदक नं ११३६ निसें ११३९ तकया हे छक्वलं लःल्हाःगु दु । थ्वयां न्ह्यः विभागं न्यादँ न्ह्यःनिसें दिनाच्वंगु चैन लाकौल सिरपाः व लाकौल सिरपाः नं लःल्हाय्धुंकूगु दु। विभागया पीनिक्वःगु बुदिं ज्याझ्वलय् हे थीथी छात्रवृत्तिया नं घोषणा जूगु दु। यल महानगरपालिकाया मेयर चिरिबाबु महर्जनं विभागया न्याम्ह विद्यार्थीतय्त विभागया सिफारीस कथं यल महानगरपालिकापाखें छात्रवृत्ति बीगु घोषणा यानादिल।

अथे हे, यलया भाषा, संस्कृति, त्वाःबहाः आदि थाय्बाय्या अनुसन्धान विभागपाखें याय्गु नितिं महानगरपालिकां ग्वहालि याय्गु घोषणा नं यानादिल। विभागीय प्रमुख राजनलाल जोशीं थःगु कार्यकालय् विभागयात न्ह्यःने यंकेत थम्हं माःकथं ज्या याय्गु प्रतिवद्धता प्वंकुसें थःगु जिम्मेवारी कथं हे दिनाच्वंगु सिरपाःत बीगु न्ह्याकागु व विद्यार्थीतय्त अध्ययनया नितिं माःगु सहज वातावरण दय्केत थम्हं माःकथंया पहल याय्गु धयादिल । लिसें वागमती प्रदेशय् नेपालभाषायात कामकाजी भाषाया रुपय् छ्यलेगु खँ जुयाच्वंसां कानून तयार जुइमाःगु व कानून दय्केत विभागं ग्वहालि याय्गु नं विभागीय प्रमुख जोशीं धयादिल ।समाजया उत्थानया नितिं भाषा दकले तःधंगु माध्यम खः। भाषाया संरक्षण जुइफःसा जक समुदायया नं उत्थान जुइफइ । अले भाषाया संरक्षण व उत्थानया नितिं मदय्क मगाःगु धइगु मातृभाषा शिक्षा खः ।

थःगु मांभासं शिक्षा काय्दःसा याकनं सय्के नं फइ, शिक्षाया हे नितिं धकाः भाषा त्वःतेमाःगु अवस्था नं दइमखु । थौंकन्हय् नेपालभाषा केन्द्रीय विभागय् स्नातकोत्तर तगिं लिसें एम.फिल. पिएच.डी तगिमय् विद्यार्थीया ल्याः नं अप्वयावःगु दु । व सकारात्मक पक्ष खः । उकिया नापं विद्यार्थीतय्त छात्रवृत्ति, सिरपाःलिसेंया सुविधा वा सम्मानं विद्यार्थीतय्त हौसला नं बी । आः वयाः विभागं छगू न्हूगु गति काःगु खनेदुगु बांलाःगु खँ खः व विभागया थ्व सक्रियतायात च्वछाय् नं माः । उकिया नापं नेवाः ख्यलं फुकथं, खंकथं विभागयात तिबः बीगु समुदायया नं दायित्व खः।

Categorized in राष्ट्रिय