नारायणी खुँसिइ लःया सतह थहावयेवं भारतं गण्डक बाँधया दक्को लुँखा चायके बिइवं पूर्वी व पश्चिम नवलपरासीया ४० स्वया अप्पो गां डुबे जुइगु जोखिमय् दु।

निन्हु तक लगातार वाः वयेवं भारतं पूर्वी नवलपरासीया त्रिवेणी ब्यारेजया गण्डक बाँधय् दक्को ३६ गु लुँखा (फाटक) चायेका बिउगु दु। बाँधया लुँखाया ताःचाः न्ह्या वलय्ं भारतं तयेगु याइ। भारतं लुँखा चायेकलकि नेपाया वस्ती डुबानया जोखिम जुइगु याइ।

देवघाटय् जलमापन केन्द्रं नारायणी खुँसिइ लःया सतह खतरा जुइगु धायेवं क्वय् (तटीय क्षेत्र) य् खतरा जुइफु धका भारतं लुँखा चायेकेगु याइ। साढे ८ लाख क्यूसेक बेगया लः धाने यायेगु गण्डक बाँधया क्षमता खः। पुलागु बाँध जुगु काराणं संरचना जीर्ण जुइ धुकुगुलि आः ब्यारेजय साढे ४ लाख क्यूसेक स्वया अप्पो लः धानेयाये फइमखु धका भूआर्जन व जनसम्पर्क कार्यालय भैंसालोटनया अमित खड्कां धाउगु दु।

लःया सतह ३ लाख ६७ हजार क्युसेक थ्यनकि खतरा माने याइ। आः २ लाख ९७ हजार प्रतिसेकेण्डया बेगं लः वयाच्वंगु दु। वाः वया हे च्वंगुलि छु न इलय् खतरा जुइफु धका धाउगु दु।

Categorized in राष्ट्रिय