धर्मकीर्ति विहारय् अमेरिकी कवियित्री
लहनान्युज | सिल्लागा एकादशी ११३८ (फ्रेअवरी ११ २०१८)
![](https://www.lahananews.com/sites/default/files/Dharna%20Kriti%20Biahar.jpg)
धर्मकीर्ति विहारय् अमेरिकन बुद्धिष्ट कवि पिनिगु चिनाखँ बिषयस छगू प्रबचन ज्याझ्वः जूगु दु ।
धर्मकीर्ति विहारया नायः धम्मवती गुरुमांया सभाधक्ष्यय् न्ह्याःगु उगु ज्याझ्वलय् नेपालभाषा परिषदया इनापय् झायादीम्ह अमेरिकी कवयित्री विला सेनेबर्गं अमेरिकाय् च्वंपिं कविपिसंनं बुद्ध शिक्षाया प्रभावय् आपालं चिनाखँ च्वयातःगु दु नापं थौंकन्ह्य लोकंह्वानाच्वंगु हाइकु नं जापानी बौद्ध भिक्षु पाखें हे पलाःन्ह्याःगु खँ कनादिल ।
![](http://www.lahananews.com/sites/default/files/pictures/Dharma%20Kirti%20Bihar%202.jpg)
अमेरिकी कविपिसं च्वयातःगु हाइकु व चिनाखँ नं ब्वनाः न्यंकादीगु खः । ज्याझ्वलय् ब्वतिकयादीपिसं तयादीगु थी थी न्ह्यसःया लिसः नं वय्कलं बियादीगु खः ।
ज्याझ्वलय् मुँज्या नायः गुरुमानं पाहाँ कवियित्री मय्जुयात मतिनाया चिं लःल्हानाबिज्यासे हनाबना याःगु खः । गुरुमामं पञ्चशील प्रदान यानाबिज्याये धुंकाः कोषया ल्यूदांभरिं अरुण सिद्धि तुलाधरजुं ज्याझ्वः न्ह्याकादीगु उगु ज्याझ्वलय् छयाञ्जे प्रफुल्ल कमल ताम्राकारजुं लसकुस न्वचु बियादीगु खःसा दुजः नबिन चित्रकाराजुं कवियित्री सेनेबर्गजुया म्हसीका बियादीगु खः ।
बुद्धया जन्मभुमि नेपालय् वयाः बौद्धधर्मया चिनाखँयात कयाः सहलह यायेखनाः तसकं लय्तागु नापं नेपाः वयाः स्वनिगःया थीथी एतिहासिक स्थलत स्वयेखनाः तसकं लय्ताःगु खँनं कनादिल । कवियित्री सेनेबर्गजुया थुगु नेपाः भ्रमणया झ्वलय् खुगू ब्यागलंब्यागलं ज्याझ्लय् ब्वतिकयादिसे सहलह ब्याकादीगु खः ।
बुखँ नेवाः सुचना केन्द्र
(किपा सुरेश मान डंगोल)