भुमि एमडिआर इन्डस्ट्रिजं सँ हाइगु, न्हूगु सँ मवइगुलिसें छ्यनय् त्वः दाइगुलिसेंया समस्या ज्यंकीगु चिकं दय्कागु दावी याःगु दु। वंगु शनिबाः येँय् थःगु उत्पादन यचु हेयर आयलया औपचारिक घोषणा यासें कम्पनीं थथे दावी याःगु खः।

येँ महानगरपालिकाया उपप्रमुख सुनिता डंगोलं भुमि इन्डस्ट्रिजया उत्पादन यचु हेयर आयलया औपचारिक घोषणा यानादिल। ज्याझ्वलय् न्ववासें कम्पनीया प्रवन्ध निर्देशक उज्वल मानन्धरं थःपिन्सं प्यताजि चिकं उत्पादन याय्त स्वयागु खःसां आःयात स्वताजि जक उत्पादन न्ह्याकागु धयादिल। न्हापांगु चरणय् सँ महाइगु, न्हूगु सँ वइगु व त्वँ दाइगु समस्याया नितिं स्वताजि चिकंया उत्पादन न्ह्याकागु धासें मानन्धरं सँयात प्राकृतिक रुपं हाकु दय्कीगु चिकंया परिक्षण जुयाच्वंगु जानकारी बियादिल।

बौबाज्याया पालंनिसें यानावःगु सामाजिक अभ्यासया हे लिधंसाय् ३३ ताजि प्राकृतिक जडिबुटिलिसेंया सामग्री तयाः यचु हेयर आयल दयेकागु मानन्धरं धयादिल। थुगु चिकंया सफल परिक्षण नं जुइधुंकूगु व थुकिया परिणाम प्रमाणित नं जुइधुंकूगु वय्कःया दावी खः।

येँ महानगरपालिकाया उपप्रमुख डंगोलं स्थानीय आदिवासी उत्पादनयात हे ब्रान्डिङ यानाः आर्थिक समृद्धिपाखे न्ह्याःवनेमाःगु धयादिल। मेपिन्सं पु्रफ यानाः एप्रुभ यानाबीमा धकाः पियाच्वनेगु स्वयां थःगु प्रमाणित आदिवासी उत्पादनयात बः बीत वय्कलं इनाप यानादिल ।

Categorized in मनोरन्जन