वक्तृत्वकला मूगुठीया अध्यक्षय् विश्वन्तर शाक्य
नृपेन्दलाल श्रेष्ठ | दिल्लागा दशमी ११४२, साउन ७ शनिवाः
![](https://www.lahananews.com/sites/default/files/mu-guthi.jpg)
बौद्ध वक्तृत्वकला मूगुठीया झीखुक्वःगु वार्षिक साधारण सभां विश्वन्तर शाक्यया अध्यक्षताय् १३ म्ह सदस्यीय कार्यसमिति ल्यःगु दु।
थौं शनिबाः यलया न्याखाचुकःय् जुगु सभां शाक्यया नेतृत्वय् कार्यसमिति ल्यःगु खः। शाक्य निर्वाचित जुइवं वयकलं थःगु कार्यकालय् संस्थाया ज्याकू स्थापना, दँय् दँसं वक्तृत्वकला सञ्चालनया लागि आर्थिक सुनिश्चित यायेगु कथं अक्षयकोषया स्थापना यायेगु व ब्वतिइ काइपिनिगु लागि नगद पुरस्कार ५० हजार रुपैयाँ थ्यकिइगु प्रतिबद्धता व्यक्त यानादीगु खः।
अथेहे उगु समितिया निर्वतमान अध्यक्ष पूर्णराज शाक्य, उपाध्यक्षय् रविन्द्र शाक्य, महासचिवय् मदनरत्न तुलाधर, सचिवय् श्रमिक अवाले, कोषाध्यक्षय् गौतम शाक्य रव सहकोषाध्यक्ष कर्ण शाक्ययात ल्यःगु खः। अथेतु, कार्यसमिति सदस्यपि सञ्चित बुद्धाचार्य, सुनीता मानन्धर, दीपक शाक्य, प्रशान्तदेव शाक्य, गौतम शाक्य व अमोवीर बज्राचार्ययात ल्यउगु खः।
वाग्मती प्रदेशया सांसद् ज्ञानेन्द्र शाक्यं उलेज्या यानादीगु उगु ज्याझ्वलय् वयकलं धयकादीगु दु वक्तृत्वकलाया माध्यमपाखे ल्याम्ह तयेत बुद्ध शिक्षा प्रवाह यायेत २८ दँनिसे सञ्चालन जुयावयाच्वंगु वक्तृत्वकलायात निरन्तरता व माःगु कथं ग्वाहालि यायेत थः न्ह्यावलय् न तयार दु धका बचं बियादीगु खः।
अध्यक्ष पूर्णराज शाक्यया सभाध्यक्षताय् जुगु उगु ज्याझ्वलय् बौद्ध विहार संघया अध्यक्ष नानीकाजी शाक्य, यल महानगरपालिका वडा नं ६ या अध्यक्ष रुपेन्द्रराज शाक्य, वडा नं १६ या वडाअध्यक्ष निर्मलरत्न शाक्य, लोटर्स रिसर्च सेन्टरया अध्यापक वीरराज शाक्य, स्कोप सहकारीया पूर्वअध्यक्ष किशोरभाई बज्राचार्य, विश्वशान्ति पुस्तकालया पूर्वअध्यक्ष बाबुराजा बज्राचार्य, मूगुठीया पूर्वअध्यक्ष शुक्रराज शाक्य, देवेन्द्र बज्राचार्य बौद्ध युवा कमिटी यलया पूर्वअध्यक्ष सुनील महर्जनपिन्स न थःथःगु बिचाः तयादीगु खः।
मूगुठी विसं २०५० निसे दँय् दँसं असार पुन्हि कुन्हु स्वनिगः दुने बौद्ध वक्तृत्वकला कासा न्ह्याका वया च्वंगु प्रतिनिधिमूलक संस्था खः।
Categorized in राष्ट्रिय